Блогер Ерболат Жанабылов пен Эльмира Төлегеновадан тәркіленген көліктер сатылды

Блогерлер Ерболат Жанабылов пен Эльмира Төлегенова бұған дейін ұтысқа тігеміз деп уәде берген, кейін тәркіленген автокөліктер электронды сауда арқылы сатылды, – деп хабарлайды Aikyn.kz сайты.

E-Qazyna мемлекеттік мүлік порталында өткен аукцион қорытындысы бойынша сегіз Hyundai Elantra автокөлігі мемлекеттік органдарға берілді. Портал мәліметінше, көліктер "Zhana Business" ЖШС-нің атына тіркелген. Компанияның құрылтайшысы – Эльмира Төлегенова.

Сауда-саттық 7 шілде күні өтті. Кейбір көліктің бастапқы бағасы шамамен 8,4 миллион теңгені құрады. Алайда оларды тек мемлекеттік мекемелер мен кәсіпорындар, соның ішінде әлеуметтік және білім беру ұйымдары ғана сатып ала алды.

Ал 8 шілдеде блогерлердің оқырмандарына арналмақ болған 17 дана iPhone 16 смартфоны да E-Qazyna порталы арқылы сатылымға шығарылады.

Сатушы ретінде Астана қаласының Мемлекеттік мүлік және жекешелендіру департаменті көрсетілген. Смартфондардың бастапқы бағасы – 484 990 теңге, ал кепілдік жарнасы – 72 749 теңге.