Бразилиядағы президенттік сайлау: жеңімпаз екінші турда анықталады

Сенатор Флавио Болсонару мен президент Луис Инасиу Лула да Силва Бразилиядағы президент сайлауының екінші кезеңіне өтті, деп хабарлайды Tengrinews.kz CNN Brasil телеарнасына сілтеме жасап.

Бразилияның Жоғарғы сайлау соты (Орталық сайлау комиссиясының қызметін атқарады) жексенбі, 4 қазан күні кешке жариялаған дауыстарды санаудың алдын ала нәтижелеріне сәйкес, кандидаттар бірінші кезеңде ең көп дауыс жинаған.

Бюллетеньдердің 99,77 пайызын санау қорытындысы бойынша Болсонару Лула да Силвадан 1,98 пайыздық көрсеткішпен алға шықты: 47,08 пайызға қарсы 45,1 пайыз. Нақты сандармен алғанда айырмашылық 2,356 миллион дауысты құрады, деп жазады UOL порталы.

Кандидаттардың ешқайсысы 50 пайыздан астам дауыс жинай алмады, сондықтан жеңімпаз 25 қазанға белгіленген екінші кезеңде анықталады.

Бұл сайлау елдің солшыл басшылықты сақтап қалуын немесе АҚШ президенті Дональд Трамп қолдайтын консервативті оңшыл толқынға қосылуын шешеді, деп жазады Euronews.

Қазіргі мемлекет басшысы, солшыл күштердің 80 жастағы ардагері Лула да Силва төртінші мерзімге сайлауға түсіп жатыр. Оның айтуынша, бұл - соңғы мерзім. Ол Трамп әкімшілігінің қысымы салдарынан Бразилияның егемендігіне қауіп төніп тұрғанын мәлімдеген.

Луланың басты қарсыласы - 45 жастағы сенатор Болсонару бұған мүлдем қарама-қайшы ұстанымда. 2019-2022 жылдары Бразилияны басқарған әкесі Жаир Болсонару сияқты, ол да Вашингтонмен жақындасуды жақтайды, Ақ үймен байланысының тығыздығын алға тартып, Бразилияға Трамп әкімшілігімен, ең алдымен, сирек кездесетін минералдарды өндіру саласында тиімді келісімдер қажет екенін айтады.

Бізді Google-дың негізгі дереккөздер тізіміне қосыңыз