Британдықтар Johnson & Johnson компаниясын қауіпті балалар ұнтағын сатқан деп айыптады

Олардың мәлімдеуінше, америкалық фармацевтикалық компания ізбеспен ластанған тальк негізіндегі балалар ұнтағын әдейі сатумен айналысқан, деп жазады The Guardian газеті.

Талапкерлердің сөзінше, өздері немесе туыстары Johnson’s Baby Powder балалар ұнтағын қолданғаннан кейін аналық без обыры немесе мезотелиома (ізбес әсерінен пайда болатын қатерлі ісік түрі) дертіне шалдыққан. Олар Англия соты арқылы өтемақы талап етіп отыр.

Мезотелиома — көбіне ізбестің әсерінен пайда болатын қатерлі ісік түрі. Ол, әдетте, өкпеде дамиды, себебі адам минералдың микроскопиялық талшықтарын жұтып қояды.

Адвокаттардың айтуынша, Johnson & Johnson ондаған жыл бойы бұл тәуекел туралы ақпаратты жұртшылықтан жасырған. Кейін компания өнім құрамындағы талькты жүгері крахмалына ауыстырған, алайда тальк негізіндегі ұнтақ өндірісін және сатылымын Ұлыбританияда және бүкіл әлемде тек 2023 жылы ғана тоқтатты, яғни АҚШ пен Канадада сатылымнан алынғаннан кейін үш жыл өткен соң.

Johnson & Johnson барлық айыптауды, соның ішінде ізбеспен ластанған ұнтақты әдейі сатты деген мәлімдемелерді жоққа шығарып отыр. Компанияның бұрынғы бөлімшесі болып, екі жыл бұрын жеке құрылымға бөлініп шыққан және АҚШ пен Канададан тыс талькке қатысты істермен айналысатын Kenvue өкілінің айтуынша, пайдаланылған тальк нормативтік талаптарға сай болған, құрамында ізбес болмаған және қатерлі ісік туғызбайды.

Johnson & Johnson өнімдерінде қолданылған тальк табиғи минерал, ол көбіне ізбес кен орындарының маңынан өндіріледі. Дүниежүзілік денсаулық сақтау ұйымының деректері бойынша, ізбестің кез келген түрі бірнеше түрлі қатерлі ісік ауруын тудыра алады және созылмалы тыныс алу жолдары ауруларына әкелуі мүмкін.

Адвокаттар өздерінің талап-арыздарында өндірістік ауқымда өңдеуге жарамды әрі ізбестен толық таза тальк кен орындары әлемде өте аз екенін мәлімдеді. Олардың айтуынша, жауапкер компанияға тальк жеткізген барлық шахта ізбеспен ластанған.

Сондай-ақ осы шахталар бойынша жасалған есептер, компанияның өз зерттеулері мен ғылыми жарияланымдар Johnson & Johnson-ды тальктің ізбестен ластану қаупі туралы хабардар етуге тиіс болған. Алайда компания, талапкерлердің айтуынша, балалар ұнтағының қауіпті болуы мүмкін екендігін көрсететін ақпаратты әдейі жасырып келген.

Сонымен қатар Johnson & Johnson реттеуші органдарға қысым жасап, өнім сатылымын жалғастыруға тырысқан және адамның денсаулығына қауіптің төмен екендігін көрсету мақсатында зерттеулерді қаржыландырған деп хабарланады.

Ұлыбританиядағы бұл оқиға АҚШ-тағы ауқымды сот істерінің жалғасы іспеттес, онда да Johnson & Johnson компаниясына қарсы осындай мазмұндағы көптеген талап-арыз берілген. Кей жағдайларда талапкерлер миллиардтаған доллар көлемінде өтемақы алса, компания кей апелляцияларда өз пайдасына шешім шығартуға қол жеткізген.

Адвокаттардың бағалауынша, Ұлыбританияда өндіріліп алынуы мүмкін өтемақы сомасы жүздеген миллион фунт стерлингке жетуі ықтимал. BBC атап өткендей, бұл іс ел тарихындағы өнім сапасына қатысты ең ірі сот процесі болуы мүмкін.

Бұған дейін АҚШ соты Johnson & Johnson компаниясын балалар ұнтағының қатерлі ісік тудырғаны үшін шамамен 1 миллиард АҚШ доллары көлемінде өтемақы төлеуге міндеттеген еді.