Бұрынғы әйелін бірнеше жыл қудалаған сталкер жауапқа тартылды

Сотты болған азамат бірнеше жыл бойы ажырасып кеткен әйелінің мазасын алған. Жәбірленуші онымен хабарласпаймын дегеніне қарамастан, оның үйіне келіп, кіре беріс есігін бұзып, бірнеше рет пәтерге заңсыз кірген. Жәбірленуші сталкердің заңсыз іс-әрекетінен қорқып, пәтерінен кетіп, анасының үйін паналаған. Сонда да сотталушы жәбірленушінің қыр-соңынан қалмай, агрессия көрсетіп, жанжалдасқан. 
Ол сонымен қатар тұрақты түрде бейтаныс нөмерлерден жәбірленушіге хабарласып, хат  жолдап отырған. Сотталғанның іс-әрекеттері жәбірленушінің үнемі мазасын алып, қорқытатын сипатта болған.

— Жәбірленуші сталкердің тарапынан жүйелі түрде заңсыз әрекет жасалғандықтан, өзінің өмірі мен қауіпсіздігі үнемі үрейленетін болған. Бұл оның қозғалыс еркіндігін және күнделікті белсенділігін айтарлықтай шектеді, — деп хабарлады прокуратурадан. 

Астана қаласының қылмыстық істер жөніндегі ауданаралық соты сотталушыны кінәлі деп танып, оған 100 (жүз) сағат қоғамдық жұмысқа тарту түріндегі жаза тағайындады.
Прокуратура заңсыз қудалау үшін айыппұл түрінде 200 айлық есептік көрсеткішке дейін, не сол мөлшерде түзеу жұмыстары, не 200 сағатқа дейін қоғамдық жұмыстарға тарту, не 50 тәулікке дейін қамауға алу түріндегі қылмыстық жауапкершілік көзделгенін ескертеді.

Еске сала кетейік, ІІМ сталкинг бойынша  сотқа 51 іс жолданғанын мәлімдеген болатын.