Пиротехника: 14 адам жауапқа тартылды

Жаңа жыл мерекесі қарсаңында пиротехникалық бұйымдардың заңсыз айналымына қарсы рейдтік іс-шаралар күшейтілді. Абай облысында жыл басынан бері полицейлер 150-ден астам рейд өткізген. 

Тексеру барысында отшашуды заңсыз саудалаған 27 адам анықталып, оларға әкімшілік айыппұл салынды. Мұндағы мақсат тұрғындардың қауіпсіздігін қамтамасыз ету және жазатайым оқиғалардың алдын алу. 

20 желтоқсаннан бері Семейде отшашуды заңсыз саудалаған 14 адам әкімшілік жауапкершілікке тартылды. Ауа-райының қолайсыздығына қарамастан ТЖД мен полиция қызметкерлері бірлесіп, сауда орындарын аралап шықты. Рейд барысында сатушыларға пиротехникалық бұйымдарды сақтау және сату тәртібі түсіндіріліп, тұрғындарға қауіпсіздік талаптары ескертілді.

Елдос Оразалин, Семей қаласы полиция басқармасы қоғамдық қауіпсіздік бөлімінің бастығы: 

- Бұлардың бәріне 25 АЕК мөлшерінде айыппұл салынды. Қоғамдық жерлерде отшашу, пиротехникалық құрылғыларды атқаны үшін облыс аумағында екі дерек анықталып, әкімшілік сотқа шешім қабылдау үшін жолданды. Оны біз тәркілеп аламыз, сосын іс шара біткен соң қолхат арқылы иесіне қайтарып береміз. 

Былтырғы жылмен салыстырғанда өңірде пиротехникалық бұйымдарды заңсыз сатқандар екі есеге азайған. Мамандар: «Қауіпсіздік талаптары сақталмай қолданылған отшашулар төтенше жағдайларға әкелуі мүмкін», - дейді. Сондықтан отшашуды тек арнайы лицензиясы бар сауда орындарынан сатып алу қажет. Пайдаланбас бұрын нұсқаулықпен мұқият танысып, тұрғын үй маңынан 50 метр қашықтықта қолдану қажет.

Бауыржан Әрінов, ТЖД Мемлекеттік өрт бақылау басқармасының бастығы:

- Лицензиясы жоқ немесе ақауы бар отшашу іске қосылмай қалса, оған бірден жақындауға болмайды. Себебі аяқ-асты жарылу қаупі бар. Қазіргі уақытта пиротехникаға байланысты өрт оқиғалары тіркелмеген. Төтенше жағдайлар департаменті мен полиция қызметкерлері бірлесіп жүргізіп жатқан алдын алу шаралары оң нәтиже беріп отыр.

Рейдтік шаралар жаңа жыл мерекесі аяқталғанға дейін жалғасады. Құзырлы органдар тұрғындарды заңсыз саудаланған отшашудан бас тартып, мерекені қауіпсіз қарсы алуға шақырады.

Авторлары: Рүстем Қайратұлы, Медет Өміранов