Ұшақтағы тегін интернет Starlink Қазақстанға ұшатын тағы бір әуе компаниясына жетті

Vietjet азиялық лоукостерінің жолаушылары ұшу кезінде Starlink жоғары жылдамдықты спутниктік интернетін тегін пайдалана алады, деп хабарлайды Tengri Travel.

Әуекомпания баспасөз қызметінің мәліметінше, Starlink (SpaceX компаниясы әзірлеген және басқаратын спутниктік интернет сервисі) компаниясымен стратегиялық серіктестік туралы келісімге Нью-Йоркте қол қойылды.

Салтанатты шараға Вьетнам Коммунистік партиясы орталық комитетінің бас хатшысы, Президент То Лам, сондай-ақ екі ел компанияларының басшылары қатысты.

Starlink қай ұшақтарда іске қосылады?

Бастапқы кезеңде Starlink-пен Vietjet-тің халықаралық және ішкі рейстерін орындайтын 120 әуе кемесі жабдықталады деп жоспарланған. Оның ішінде жүз Airbus A321/Boeing 737 ұшағы және жиырма Airbus A330 лайнері бар.

Болашақта тасымалдаушы жаңадан келетін барлық ұшақты осы жүйемен жабдықтап, ішкі және халықаралық барлық бағытты біртіндеп қамтуды көздеп отыр.

Әуекомпания кідірісі аз, төмен орбиталық спутниктік байланыстың арқасында жолаушылар келесі мүмкіндіктерге ие болатынын хабарлады:

жұмыс істеу; контент жасау; мұхиттар мен шалғай аймақтардың үстінде болса да байланыста қалу.

Компания басшылығы борттағы Wi-Fi қымбат премиум-қызметтен саяхаттағы үйреншікті цифрлық стандартқа айналады деп күтеді.

"Starlink-тің арқасында ұшу уақыты бұдан былай желіден тыс болуды білдірмейді. Vietjet жолаушылары бүкіл сапар бойы жұмыс, ойын-сауық немесе отбасымен және достарымен сөйлесу болсын - әрдайым байланыста бола алады. Бұл Vietjet-тің инновацияларға деген адалдығын және озық технологияларды көптеген адамға қолжетімді етуге деген ұмтылысын көрсетеді", - деп атап өтті Vietjet директорлар кеңесінің төрағасы, доктор Нгуен Тхи Фуонг Тхао.

Starlink жолаушыларға тегін болатыны нақтыланды.

Әуекомпания Қазақстанда қандай рейстерді орындайды?

Бүгінде Vietjet Қазақстаннан бірнеше бағыт бойынша рейстер орындайды:

Алматыдан Прага, Бангкок, Куала-Лумпур, Сиемреап және Ханой қалаларына; Астанадан Дананг, Фукуок және Нячанг қалаларына.

Тасымалдаушы жаңғыртудың бірінші кезеңінде спутниктік байланыс нақты қай бағыттарда пайда болатынын әзірге ресми түрде жарияламағанымен, болашақта Starlink жоғары жылдамдықты интернеті оның халықаралық флотының едәуір бөлігін, соның ішінде Қазақстанға қатысты рейстерді де қамтымақ.

Қазақстандық ұшақтарда интернет қашан пайда болады?

Бұған дейін оңтүстіккореялық Korean Air және Asiana Airlines әуекомпаниялары 15 қыркүйектен бастап жекелеген ұшақтарда Starlink арқылы тегін интернетті іске қосты. Қызмет барлық класс жолаушыларына жеке пакет сатып алусыз қолжетімді болады. Ал Қазақстанда жағдай басқаша болуы мүмкін.

Сондай-ақ Цифрлық даму, инновациялар және аэроғарыш өнеркәсібі министрлігі телекоммуникациялар комитетінің төрағасы Дамир Сейсембеков интернетке қолжетімділігі бар алғашқы ұшақтар Қазақстанда қазанда пайда болуы мүмкін екенін айтты. Оның сөзінше, министрлік Air Astana және америкалық Viasat компаниясының өкілдерімен кездесу өткізген.

Бұған дейін Қазақстанның авиациялық әкімшілігі мемлекет әуекомпаниялар мен спутниктік интернет жеткізушілері арасындағы келіссөздерге қатыспайтынын хабарлады. Тасымалдаушылар қосылу мерзімін, қызмет құнын және қолжетімділік шарттарын өз бетінше анықтайды.

Тағы оқыңыз: Астананың жаңа әуежайы: құрылысқа кім қатысатыны белгілі болды

Бізді Google-дың негізгі дереккөздер тізіміне қосыңыз

Қосу