БҰҰ: 2025 жылы қауіпті миграциялық маршруттарда 8 мыңға жуық адам қаза тапты

Біріккен Ұлттар Ұйымы агенттігінің мәліметінше, қаржыландырудың қысқаруы гуманитарлық қолжетімділік пен қаза болғандарды тіркеуге кері әсер еткендіктен, құрбандардың нақты саны бұдан әлдеқайда көп болуы мүмкін.

Халықаралық көші-қон ұйымы заңды миграция жолдарының тарылып бара жатқанын атап өтті. Соның салдарынан Еуропа, АҚШ және басқа өңірлер миграцияны тежеу шараларын күшейтіп, заңнаманың орындалуын қатаңдатқан сайын, көп адам контрабандистердің қолына түсіп қалып жатыр.

— Көші-қон бағыттарында адамдардың қаза табуының жалғасуы — біз қалыпты жағдай ретінде қабылдай алмайтын жаһандық сәтсіздік, — деді ұйымның бас директоры Эми Поуп бейсенбі күні жарияланған мәлімдемесінде.

Халықаралық көші-қон ұйымы (International Organization for Migration, IOM) мәліметінше, 2025 жылы миграция бағыттарындағы қаза тапқандар саны 2024 жылғы шамамен 9200 адамнан 7667 адамға дейін азайған. Бұл қауіпті заңсыз сапарларға талпынған адамдар санының қысқаруымен байланысты. Алайда ұйым бұл төмендеу ақпаратқа қолжетімділіктің шектелуі мен қаржыландыру тапшылығын да көрсететінін, соның салдарынан өлім-жітімді тіркеу жұмыстары қиындағанын атап өтті.

Бұған дейін Италия иммиграциялық саясатты күшейтіп, теңіз блокадасын енгізгені хабарланды.