Бюджет есебінен iPhone: Қарағандыда аудан әкімдігіне қымбат смартфон не үшін керек болды

Қарағанды облысында Бұқар жырау ауданы әкімінің аппараты мемлекеттік сатып алу порталы арқылы қымбат смартфон сатып алған. Құрылғының құны 1 миллион теңгеден асты.

Мемлекеттік сатып алу жүйесінде жарияланған мәліметке сәйкес, тапсырыс беруші — «Бұқар жырау ауданы әкімінің аппараты» мемлекеттік мекемесі. Лоттың техникалық сипаттамасында Apple iPhone 16 Pro Max смартфоны көрсетілген. Бір данасының бағасы 1 070 689 теңгені құраған. Лот «сатып алу өтті» мәртебесімен аяқталған.

Өтінімдерді қабылдау 10–14 сәуір аралығында жүргізілген.

Әкімдік өкілдері сатып алудың ақпараттық-талдамалық жұмыстың сапасын арттыру қажеттілігімен байланысты екенін түсіндірді.

— Бұқар жырау ауданы әкімінің аппараты — әкім қызметін ақпараттық-талдамалық тұрғыда сүйемелдеуді қамтамасыз ететін мекеме. Мемлекеттік органның жұмысын бұқаралық ақпарат құралдарында жариялау — биліктің есептілігінің маңызды бөлігі әрі халықты іске асырылып жатқан және аяқталған жобалар туралы тікелей хабардар етудің тиімді арнасы. Осы жұмыстың сапасын арттыру мақсатында, жоғары өнімділігі мен техникалық сипаттамаларын ескере отырып, аталған құрылғыны сатып алу туралы шешім қабылданды. Сатып алуға бөлінген қаражат аудандық бюджеттік комиссия тарапынан мақұлданды, — деп хабарлады ведомство.

Сондай-ақ әкімдікте сатып алу рәсімі мемлекеттік сатып алу туралы заңнамаға сәйкес баға ұсыныстарын сұрату тәсілімен өткізілгені атап өтілді.

— Шарт жасасу және құрылғыны сатып алу тек мемлекеттік органның қызметтік қажеттіліктері үшін жүзеге асырылады, — деп толықтырды мекемеде.

Айта кетейік, бухгалтерлік есеп талаптарына сәйкес смартфон мемлекеттік органның балансына қойылып, оған түгендеу нөмірі беріледі.

Бұған дейін Қарағанды облысында мемлекеттік сатып алу бойынша заң бұзған 12 лауазым иесі жазаланған болатын.