Кредиттер бюджет есебінен кешіріле ме агенттік басшысы жауап берді

АСТАНА, 5 қараша – Sputnik. Қаржы нарығын реттеу және дамыту агенттігінің төрағасы Мәдина Әбілқасымова бұрынғыдай кредиттерді қайта кешіруге қатысты пікір білдірді, деп хабарлайды Sputnik Қазақстан тілшісі.

Кредиттік амнистия бюджет есебінен жасалады. 2019 жылы тура солай істеген. Қиын жағдайға тап болған қазақстандықтардың қарызы бюджет ақшасынан жабылып, есептен шығарылған болатын.

"Өкінішке қарай, бізде 2019 жылы болған кредиттік амнистиядан кейін қарызы кешірілген адамдардың бір бөлігі тағы кредит алып, уақытында төлей алмады. Сосын ондай тәжірибенің моральдық қауіп-қатері бар. Адамдар әрбір 5-6 жыл кредиттік амнистия болады деп ойлайды. Ондай шара бюджетке де үлкен салмақ түсіреді",- деді Әбілқасымова мәжілісте өткен брифингте.

Оның айтуынша, бүгінде кредиттік амнистияның баламалы жолдары бар. Мәселен, қарызды қайта құрылымдауға болады.

Бұдан бөлек, жеке тұлғалардың банкроттықты қолдануға мүмкіндігі бар.