БЖБ және ТЖБ ны тоқтату 1 қыркүйектен бастап қазақстандық оқушылар үшін не өзгереді

1 қыркүйектен бастап Қазақстанда 2-4 сынып оқушыларын бағалау тәсілі өзгереді. Жаңа жүйе балалар мен педагогтарға түсетін бағалау жүктемесін азайтуға және баланың тек білімін ғана емес, сонымен қатар дағдыларын да көбірек ескеруге мүмкіндік береді деп күтіледі, деп хабарлайды Tengrі Education.

Орталық коммуникациялар қызметінде өткен баспасөз мәслихатында педагог-шебер Жанар Жақсылықованың айтуынша, бастауыш сыныптарда БЖБ мен ТЖБ жойылып, әр бөлім аяқталғаннан кейін аралық бағалау жүргізіледі.

"Бұған дейін бөлім бойынша жиынтық бағалауды өткізуге 15-тен 20 минутқа дейін уақыт берілсе, жаңа форматта аралық жұмыс бүкіл сабақ бойына қарастырылған", - деп түсіндірді педагог.

Жақсылықованың айтуынша, жаңа тәсіл оқушыларға түсетін жүктемені азайтуға және бағалау үдерісін барынша жайлы етуге бағытталған. Оқушылардың тапсырмаларды орындап қана қоймай, алған білімі мен дағдыларын көрсетуіне де жеткілікті уақыты болуы тиіс.

Бұл ретте 2-4 сыныптардағы қалыптастырушы бағалау өзгеріссіз қалады – 1-ден 10 балға дейінгі шкала бойынша.

"Баға оқушының бір тапсырмасының нәтижесін емес, бүкіл сабақ барысындағы жұмысын көрсетуі керек. Яғни, бұл сұрақтарға жауап беру, өздік жұмыс, жұптық, топтық жұмыс, үй тапсырмасы және тағы басқалары болуы мүмкін", - деп түйіндеді ол.

Бұған дейін Оқу-ағарту министрлігі бұйрық жобасын дайындаған болатын, оған сәйкес бастауыш мектепте үйреншікті БЖБ мен ТЖБ-дан бас тартуы мүмкін екені айтылды.

Сондай-ақ жаңа оқу жылынан бастап Қазақстан мектептерінде жаңа міндетті пәндер мен курстар пайда болады. 5–7-сынып оқушылары үшін "Конституция негіздері" пәні енгізіледі. 8–11-сыныптарда "Заң және тәртіп" міндетті курсы оқытылады. Сонымен қатар, 5–11-сынып оқушылары үшін "Жеке қауіпсіздік" міндетті курсы енгізіледі.

Google News арқылы жаңалықтарымызды қадағалаңыз