Cerebras: Nvidia ға жаңа бәсекелес пе?

CNBC телеарнасының хабарламасына сүйенген Aikyn.kz жасанды интеллект үшін жаңа көлемдегі чиптердің танымал болу себебін түсіндіреді.

Кремний алқабында орналасқан компания ЖИ-ге арналған арнайы ASIC-чиптер шығарады. Оның негізгі өнімі көлемі жағынан кәдімгі ас тәрелкесіндей.

Cerebras-тың Wall Street-тегі алғашқы сауда күні компанияның нарықтық құны 100 миллиард долларға жақындады. Бұл технологиялық IPO тарихындағы ең ірі оқиғалардың бірі ретінде бағаланды. Дегенмен келесі күні акциялар 10%-ға төмендеген, бұл нарықтағы қызығушылықпен қатар сақтықтың да бар екенін көрсетті.

Компанияның басты ерекшелігі – WSE-3 чипі. Cerebras бас директоры әрі тең құрылтайшысы Эндрю Фельдман CNBC эфирінде: «Біз жартылай өткізгіш индустриясындағы ең үлкен чиптерді шығарамыз», – деді. 

Оның айтуынша, үлкен чиптер көбірек ақпаратты аз уақытта өңдеп, нәтижені жылдамырақ береді. Nvidia графикалық процессорлары үлкен модельдерді оқытуда әмбебап құралға айналса, Cerebras негізінен инференцияға, яғни дайын ЖИ моделінің жаңа ақпарат негізінде шешім қабылдауына бағытталған. Бұл агенттік ЖИ дәуірінде ерекше маңызды бола бастады.

Cerebras дерегінше, WSE-3 ең ірі графикалық процессордан 57 есе үлкен және транзисторлары 50 есе көп. Чиптер TSMC зауытында 5 нанометрлік технологиямен өндіріледі. Компания оларды тек сатумен шектелмей, өз деректер орталықтарында бұлттық қызмет ретінде де қолданады.

Cerebras-тың OpenAI-мен 20 миллиард долларлық бұлттық келісімі және Amazon Web Services-пен серіктестігі оның нарықтағы орнын күшейтті. Қаржы директоры Боб Комин сұраныстың өте жоғары екенін айтып, тапсырыстар 2027 жылға дейін толық сатылып кеткенін жеткізді.

Дегенмен бәсеке күшейіп келеді. Groq, SambaNova, D-Matrix және Rebellions сияқты компаниялар да ЖИ чиптері нарығында өз үлесін алуға тырысуда. Сондықтан Cerebras-тың IPO-сы тек бір компанияның жетістігі емес, бүкіл жасанды интеллект инфрақұрылымы нарығындағы жаңа кезеңнің белгісі.