Coca Cola Қазақстанда өз брендімен шығарылатын бөтелкелердегі күмәнді сұйықтыққа шағымданды

Қазақстанда "жалған" Coca-Cola анықталды. Әлемдік алпауыт Әділет министрлігіне ресми шағым түсірді, деп хабарлайды Tengrinews.kz тілшісі.

Қазақстанда "жалған" Coca-Cola анықталды. Әлемдік алпауыт Әділет министрлігіне ресми шағым түсірді, деп хабарлайды Tengrinews.kz тілшісі.

Шымкентте контрафактіге қарсы тексеру Coca-Cola компаниясының өзі шағым түсіргеннен кейін басталды. Әділет министрлігі қала базарларында танымал брендпен күмәнді сусындардың шынымен де сатылғанын растады.

"Қала базарларында жоспардан тыс тексеру нәтижесінде Coca-Cola брендімен қолдан жасалған өнімдерді сату фактілері анықталды. Тексеруге құқық иеленуші - The Coca-Cola Company компаниясының ресми өтініші негіз болды. Компания өздерінің айрықша құқықтарының бұзылғаны және қала сөрелерінде шығу тегі күмәнді өнімдердің пайда болғаны туралы мәлімдеген", - делінген хабарламада.

Фото: Әділет министрлігінің баспасөз қызметі

Министрлік ақпаратынша, жүргізілген жоспардан тыс тексерулер барысында контрафактілік салқындатқыш сусындардың ірі партиясын сату фактісі расталды. Сусындардың өндірушіден рұқсаты болмаған, ал таңбаламасы жалған болып шықты.

"Анықталған фактілер бойынша ҚР ӘҚБтК-нің 158-бабы (Бөтеннің тауар таңбасын, қызмет көрсету таңбасын, тауар шығарылған жердің атауын немесе біртекті тауарлар немесе көрсетілетін қызметтер үшін соларға ұқсас белгілерді заңсыз пайдалану) бойынша әкімшілік іс қозғалды.
​Іс материалдары сотқа жолданды", - деп толықтырды министрлік.

Ведомство контрафактілік өнімдердің тек брендтер үшін шығын ғана емес, денсаулыққа да нақты қауіп төндіретінін баса айтты. Мұндай сусындар көбінесе ешқандай нормаларды сақтамай, антисанитарлық жағдайда құйылады.

Бұл ретте министрлік кәсіпкерлерге контрафактілік тауарларды сатқаны үшін жауапкершілік бар екенін ескертеді және мұндай тексеру іс-шаралары жүйелі түрде жалғасатынын хабарлады.