Дамаск ұлттық музейінен көне мүсіндер ұрланды

Дамаск ұлттық музейінен алты мәрмәрден жасалған көне римдік мүсін ұрланғаны белгілі болды. Ұрлық дүйсенбі күні анықталған — қызметкерлер музейдің ішкі есіктерінің бірінің бұзылғанын байқапты, деп хабарлайды Arasha.kz.

1919 жылы негізі қаланған Дамаск ұлттық музейі Сириядағы ең ірі археологиялық жәдігерлер жинағына ие. Мұнда б.з.д. XIV ғасырға жататын Угариттен табылған сына жазулы балшық тақташалар сақталған — бұл адамзат тарихындағы ең көне әліпбилердің бірі. Сондай-ақ музейде ежелгі Пальмира қаласынан әкелінген грек-рим мүсіндері мен Дура-Эвропос қаласындағы б.з. III ғасырына жататын синагоганың бөліктері бар.

Музей 2012 жылы азаматтық соғыс басталғаннан кейін жабылған болатын. Сол кезде коллекцияның басым бөлігі құпия орындарға эвакуацияланған. 2018 жылы музей ішінара қайта ашылып, 2025 жылдың қаңтарында жаңа үкімет тұсында толық жұмысын жалғастырған.