Данияр Хайрушев Каспийдегі трагедиядан кейін ұсталды: ол туралы не белгілі

Қарулы күштер Әскери-теңіз күштері бас қолбасшысының бірінші орынбасары Данияр Хайрушев ұсталды, деп хабарлайды Tengrinews.kz тілшісі.

ІІМ Каспийдегі әскери қызметшілердің қаза болуына қатысты іс бойынша Қарулы күштердің бес лауазымды тұлғасы ұсталғанын хабарлады. Министрлік олардың аты-жөнін атаған жоқ. Ұсталғандардың арасында Әскери-теңіз күштері бас қолбасшысының бірінші орынбасары - штаб бастығы, екі әскери бөлім командирі, сондай-ақ теңіз жаяу әскері ротасы мен катер командирлері бар екені нақтыланды.

Қорғаныс министрлігінің ашық мәліметтеріне сүйенсек, ӘТК бас қолбасшысының бірінші орынбасары лауазымын Данияр Хайрушев атқарады. 2026 жылдың мамыр айында ведомство мемлекеттік наградалармен марапатталған әскери қызметшілердің тізімінде оны дәл осы лауазымда көрсеткен болатын.

Өмірбаяны

Данияр Жұмағалиұлы Хайрушев - Қазақстан Әскери-теңіз күштерінің кадрлық әскери қызметшісі. Қорғаныс министрлігінің жарияланымдарында ол қызметі жоғарылағанға дейін 1-дәрежелі капитан шенінде көрсетілген.

2020–2022 жылдары Хайрушев 29011 әскери бөліміне және Әскери-теңіз базасына қолбасшылық етті. 2020 жылдың қарашасында оның есімі мемлекеттік сатып алу порталының құжаттарында 29011 әскери бөлімінің өкілі ретінде аталған.

2021 жылдың соңына қарай Хайрушев 1-дәрежелі капитан шенінде болды. Сол жылдың желтоқсан айында ол Ақтаудағы Әскери-теңіз базасының командирі ретінде аталды.

Мансабының келесі кезеңі - Әскери-теңіз күштерінің басшылық құрамына ауысу.

2023 жылдың ақпанында Қорғаныс министрлігі Данияр Хайрушевті 1-дәрежелі капитан шеніндегі Әскери-теңіз күштері бас қолбасшысының орынбасары деп атады. Сол кезде ол Пәкістанға AMAN-2023 халықаралық әскери-теңіз жаттығуларына аттанған қазақстандық әскери делегацияны басқарып барған болатын.

Жауынгерлік дайындыққа жауапты болды

Кейінгі жылдары Хайрушев жұмысының негізгі бағыттарының бірі ӘТК жауынгерлік дайындығы болды.

2024 жылдың мамырында мемлекеттік телеарна эфирінде Хайрушев Әскери-теңіз күштері бас қолбасшысы басқармасының жауынгерлік дайындық басқармасының бастығы - бас қолбасшының орынбасары ретінде таныстырылды.

Сол жылы ол "Бірлестік-2024" халықаралық оқу-жаттығуын қорытындылауға қатысты. Қорғаныс министрлігінің хабарлауынша, Хайрушев ӘТК бас қолбасшысының жауынгерлік дайындық жөніндегі орынбасары лауазымында оқу-жаттығу кезіндегі бөлімшелердің тактикалық іс-қимылдары мен атыс нәтижелеріне талдау жасады.

2025 жылдың басында Хайрушев бас қолбасшының орынбасары қызметін жалғастырды. Ақтаудағы 29011 әскери бөлімінің базасында оның басшылығымен ӘТК бөлімшелерінің өткен жылғы жұмысы қорытындыланды. Қорғаныс министрлігі Хайрушевтің 1-дәрежелі капитан шенінде болғанын көрсеткен.

Қорғаныс министрлігінің тағы бір жарияланымында Хайрушевтің лауазымы толығырақ көрсетілген - ӘТК бас қолбасшысы басқармасының жауынгерлік дайындық басқармасының бастығы - бас қолбасшының орынбасары. Ақтауда өткен жедел-тактикалық оқу-жаттығулар барысында ол қолбасшылық пен офицерлердің бөлімшелерді басқаруға дайындығына қатысты пікір білдірді.

2025 жылдың қазанында Хайрушев әлі де ӘТК бас қолбасшысының жауынгерлік дайындық жөніндегі орынбасары болды. Каспий теңізіндегі кемелердің он күндік жорығы кезінде ол кемені басқаруды, навигацияны, байланыс құралдары мен қару-жарақты қолдануды пысықтаған экипаждардың дайындығын бағалады.

Лауазымның өсуі және мемлекеттік награда

2026 жылдың мамыр айына қарай Хайрушевтің лауазымы жоғарылады.

Қорғаныс министрлігі оны енді Әскери-теңіз күштері бас қолбасшысының бірінші орынбасары деп атай бастады.

Сол айда Данияр Хайрушев II дәрежелі Бауыржан Момышұлы атындағы "Айбын" орденімен марапатталды. Қорғаныс министрлігінің ақпаратынша, награда әскерлердің жоғары жауынгерлік дайындығын сақтағаны және қызметтік іс-әрекеттегі жетістіктері үшін берілді.

Каспийдегі қайғылы оқиға

24 қыркүйекте Маңғыстау облысында әскери-теңіз жаттығулары кезінде әскери қызметшілер Каспий теңізінде суға ағып кеткен. Олар Каспий теңізі жағалауында оқу-жауынгерлік тапсырмаларды орындап жатқанда, ауа райы күрт бұзылып, жел күшейген.

Бастапқыда 19 әскери қызметші суға кеткені хабарланған болатын. Кейін Маңғыстау облысының әкімдігі 17 адам екенін нақтылады.

Бұған дейін 12 адам қаза тапқаны хабарланды, үш адам құтқарылды. Құтқарылғандардың біреуі ауруханада жатыр.

Қайғылы оқиғаны тергеу үшін Үкіметтік комиссия құрылды. Оны премьер-министрдің орынбасары Қанат Бозымбаев басқарады. Комиссия қайғылы оқиғаның себептерін анықтап, қаза тапқандардың отбасыларына көмек көрсетуі тиіс.

Әскери қызметшілердің қаза болу дерегі бойынша соталды тергеп-тексеру басталды. Бұл туралы Бас прокуратура хабарлады. Тергеушілер оқиғаның барлық мән-жайын анықтап жатыр.

Президент Қасым-Жомарт Тоқаев қаза тапқан әскери қызметшілердің туған-туыстарына көңіл айтты. Мемлекет басшысы 25 қыркүйекті жалпыұлттық аза тұту күні деп жариялады.

Бүгін, 25 қыркүйекте оқу-жаттығу кезінде кеше Каспий теңізінде суға ағып кеткен тағы екі әскери қызметшінің денесі табылды. Осылайша, қаза тапқандар саны 14 адамға жетті.

Қорғаныс министрлігі Каспий теңізінде іздестіру операциясы аяқталғанын хабарлады.

Бізді Google-дың негізгі дереккөздер тізіміне қосыңыз

Қосу