Дәрі дәрмек бағасы екі есе қымбаттауы мүмкін

Қазақстанда дәрі-дәрмек пен медициналық қызметтердің бағасы қымбаттауы мүмкін.
Үкімет тегін медициналық көмектің кепілдендірілген көлемі (ТМККК) мен МӘМС аясында қолданылып келген нөлдік ҚҚС-ты алып тастау мәселесін қарастырып жатыр.

Үкіметтің мәліметінше, дәрі-дәрмек пен медицина саласына қатысты салық режимін өзгерту мәселесі салық реформасы жөніндегі жобалық кеңсенің отырысында талқыланған. Жиын барысында қатысушылар дәрі-дәрмекке бірыңғай қосылған құн салығын енгізу қажет деген ортақ пікірге келген. Алайда оның нақты мөлшері әзірге бекітілмеген.

Ұлттық экономика министрі Серік Жұманғарин жауапты органдарға ҚҚС-тың ықтимал нұсқаларын және оның фармацевтика нарығына әсерін есептеуді тапсырды.

Үкімет өкілдерінің айтуынша, жеңілдетілген және салықтан босатылған режимдердің қатар қолданылуы салық жүйесін күрделендіріп отыр. Сондықтан бірыңғай мөлшерлеме енгізу мәселесі қарастырылуда.

Қазіргі таңда Қазақстанда дәрі-дәрмек пен медициналық бұйымдарға 5 пайыздық төмендетілген ҚҚС қолданылады. Ал 2027 жылдан бастап бұл көрсеткішті 10 пайызға дейін көтеру жоспарланған. Сонымен қатар ТМККК мен МӘМС аясындағы медициналық қызметтер мен дәрі-дәрмек әзірге салықтан босатылған.

Бұған дейін қазақстандық әйелдер Ұлттық экономика министрлігіне жеке гигиена құралдарын ҚҚС-тан босату туралы петиция жолдаған еді. Олар күнделікті қажетті тауарларға салынатын салық бағаның өсуіне және қолжетімділіктің төмендеуіне әсер етіп отырғанын айтқан.