Дауыс беру аяқталды: Қазақстанда сайлау учаскелері жабылды

Қазақстанда Құрылтай депутаттарын сайлау аяқталды. Сайлау учаскелері жабылғаннан кейін комиссиялар дауыстарды санауға кірісті, - деп хабарлайды Tengrinews.kz тілшісі.

Сағат 20:00-де Қазақстан аумағындағы дауыс беру толық аяқталып, барлық 10 344 сайлау учаскесі жабылды. Жалпы сайлау өткізу үшін 10 423 учаске құрылған. Оның 79-ы Қазақстанның 61 шет мемлекеттегі өкілдіктерінен ашылды. Шетелдегі сайлау учаскелері жергілікті уақытқа сәйкес жабылады.

Фото © Tengrinews.kz / Нұрлан Әлжабаев

Сайлау учаскелері жабылар сәтке дейінгі кейінгі мәлімет сағат 18:00-де жарияланған еді. Сол уақытқа дейін 9 095 298 сайлаушы дауыс берді. Бұл - тізімге енгізілген азаматтардың 72,15 пайызы. Алайда бұл әлі түпкілікті көрсеткіш емес.

Орталық сайлау комиссиясы күн қорытындысы бойынша сайлауға қатысудың алдын ала көрсеткішін Астана уақытымен сағат 20:30-да өтетін брифингте жариялауды жоспарлап отыр.

Сағат 18:00-дегі дерек бойынша ең жоғары белсенділік Түркістан облысында тіркелді – 90,17 пайыз. Одан кейін Жетісу облысы – 89,69 пайыз және Қызылорда облысы – 88,09 пайыз. Ең төмен көрсеткіш Алматыда – 41,06 пайыз және Астанада – 49,87 пайыз болды.

Сайлаушылардың белсенділігі күн бойы біртіндеп артты. Сағат 10:00-ге дейін 2 264 411 адам, яғни сайлаушылардың 17,96 пайызы дауыс берді. Сағат 12:00-де бұл көрсеткіш 4 670 816 адамға немесе 37,05 пайызға жетті. Сағат 14:00-де 6 696 002 сайлаушы дауыс беріп, көрсеткіш 53,12 пайыз болды. Сағат 16:00-де 8 240 336 адам немесе 65,37 пайыз дауыс берді. Ал сағат 18:00-де сайлауға қатысу көрсеткіші 72,15 пайызға жетті.

Фото © Tengrinews.kz / Нұрлан Әлжабаев

Тізімге барлығы 12 605 788 дауыс беруші енгізілді. Қазақстанда және шетелде 10 423 учаске құрылды. Азаматтар жаңа бірпалаталы Парламенттің 145 депутатын сайлады. Сайлауға жеті саяси партия қатысты, сондай-ақ, бюллетеньде "Бәріне қарсымын" бағаны болды.

Фото © Tengrinews.kz / Нұрлан Әлжабаев

Бюллетеньдерді санаудан кейін аумақтық сайлау комиссиялары хаттамаларды Орталық сайлау комиссиясына тапсырады. Келу туралы алдын ала деректер сайлаудың қорытындысы шығарылды дегенді білдірмейді: Құрылтайдағы дауыстар мен мандаттардың бөлінуі кейінірек белгілі болады. ОСК ресми нәтижелерді 30 тамызға дейін белгілеуге тиіс.

Google News арқылы жаңалықтарымызды қадағалаңыз