Денсаулық сақтау министрлігі мен ІІМ жүйелері біріктірілгеннен кейін 10 мың қазақстандық куәлігінен айырылды

Денсаулық сақтау министрлігі мен ІІМ ақпараттық жүйелерін біріктіргеннен кейін Қазақстанда 10 мыңға жуық жүргізуші куәлігінің қолданысы тоқтатылды. Цифрлық жүйе жүргізушілерде көлік басқаруға медициналық қарсы көрсетілімдердің бар-жоғын анықтауға мүмкіндік береді. Бұл туралы премьер-министр Олжас Бектеновтің төрағалығымен өткен кеңесте белгілі болды, - деп хабарлайды Tengrinews.kz үкіметтің баспасөз қызметіне сілтеме жасап.

23 жүйе бірыңғай экожүйеге біріктіріліп жатыр

Денсаулық сақтау министрі Ақмарал Әлназарова 23 бытыраңқы жүйеден e-Densaulyq бірыңғай экожүйесіне көшу жұмыстарының қарқыны туралы баяндады. Бүгінде 21 мыңнан аса медициналық ұйым, 221 мың медициналық техника және 257 мың медицина қызметкерінің деректері цифрландырылған.

Ақмарал Әлназарова. Фото: primeminister.kz

Енді деректер бір рет енгізіліп, құжаттар автоматты түрде қалыптастырылады. Бұл дәрігердің ақпарат енгізуге жұмсайтын уақытын 40 пайызға қысқартуға мүмкіндік берді.

Медициналық деректердің бірыңғай қоймасына 12 жеке медициналық ақпараттық жүйеден, сондай-ақ түрлі реестрлер мен анықтамалықтардан ақпарат біріктіріліп, мемлекеттік органдардың 50-ден аса ақпараттық жүйесімен интеграцияланады.

Биылғы 1 шілдеден бастап 2012 жылдан бері жинақталған деректер автоматты форматты-логикалық бақылау негізінде медициналық көмекке ақы төлеу үшін пайдаланылып отыр.

ҚАЗІР ТАЛҚЫЛАНЫП ЖАТЫР

306 заңбұзушылық: Астанада жүргізуші жазаланды

Кеше 18:00 1

Жүйе заңбұзушылықтарды анықтай бастады

Цифрландыру тек техникалық қателерді ғана емес, сонымен қатар медициналық қызметтердің жалған көрсетілгенін айғақтайтын жағдайларды да анықтауға мүмкіндік береді. Атап айтқанда, жүйе қайтыс болған пациенттерді "емдеуді", бір дәрігердің бір уақытта әртүрлі өңірлердегі бірнеше медициналық ұйымда жұмыс істеуін және басқа да сәйкессіздіктерді анықтай алады.

Бұған дейін цифрлық бақылау нәтижесінде 1,4 миллион рецептке қатысты 400 мыңға жуық өзекті емес пациент жазбасы жойылды. Бұл 31 миллиард теңге көлеміндегі шығыстардың алдын алуға мүмкіндік берді.

Фото: primeminister.kz

Медициналық қызметтерді негізсіз тұтыну 7,1 пайызға немесе шамамен 7 миллиард теңгеге төмендеді. Бұл ретте қателерді анықтау тиімділігі 3,5 есеге артты.

Сондай-ақ цифрлық құралдар медициналық ұйымдардың жұмысындағы заңбұзушылықтарды да әшкереледі. 38 ұйымның қажетті медициналық лицензиясы болмай шықты, нәтижесінде олардың 27-сінің қызметі тоқтатылды. Сонымен қатар, сертификат мерзімінің өтуіне байланысты 2 188 медицина қызметкері жұмыстан уақытша шеттетілді.

Қазақстандықтар скринингке автоматты түрде шақырылады

Келесі кезең - профилактикалық тексерулерді автоматтандыру болмақ. 2027 жылғы 1 қаңтардан бастап скринингтен өту туралы автоматты хабарламалар жіберу жүйесін іске қосу жоспарланып отыр. Бұл азаматтарды тексеруден өту қажеттілігі туралы уақтылы хабардар етуге мүмкіндік беруі тиіс.

Медициналық жүйелердің интеграциясы басқа салаларда да қолданылып жатыр. Атап айтқанда, денсаулық сақтау және ішкі істер органдары арасындағы деректер алмасудың арқасында көлік жүргізуге медициналық қарсы көрсетілімдері бар тұлғалар анықталып жатыр.

Бүгінде шамамен 10 мың жүргізуші куәлігін қолдану тоқтатылды. Айта кетейік, бұған дейін 7 мыңнан аса қазақстандықтың медициналық қарсы көрсетілімдер бойынша жүргізуші куәлігінен айырылғаны хабарланған болатын.

Миллиардтан аса дәрі-дәрмек қорабы таңбаланды

Цифрландырудың жеке бағыты - дәрі-дәрмекпен қамтамасыз етуді бақылау. Қадағалау жүйесі 1 миллиардтан аса дәрілік препараттар қорабын және 3 мыңға жуық атауды қамтыды. 1 595 препарат бойынша баға тұрақтылығын қамтамасыз ету мүмкін болды, тағы 800 атау бойынша құн төмендеді. Экономикалық тиімділік 42,5 миллиард теңгеге бағаланып отыр.

1 қыркүйектен бастап қадағалау жүйесі биологиялық белсенді қоспаларды да қамтиды.

1 қазаннан бастап бүкіл ел бойынша вакциналар үшін "суық тізбек" цифрлық мониторинг енгізу жоспарланған. Жүйе 3 500-ден аса нысанды және медициналық препараттарды тасымалдайтын 800-ге жуық мамандандырылған автокөлікті қамтуы тиіс.

Цифрлық бақылау вакциналарды сақтау және тасымалдау кезінде температуралық режимнің сақталуын қадағалауға мүмкіндік береді.

Дәрігерлерді видео арқылы бақылай бастайды

Денсаулық сақтау саласында медицина қызметкерлеріне арналған ақылды смарт-бейнежетондар де енгізіліп жатыр. Жоба "Қазақтелекоммен" бірлесіп жүзеге асырылып жатыр. Қазіргі уақытта жоба екі өңірде – Шымкент пен Жамбыл облысында іске қосылды. Жобаны енгізуді осы жылдың аяғына дейін аяқтау жоспарланған.

Сондай-ақ жүйеде видеоаналитика мен SOS батырмалары қолданылады. Мұндай шешімдер қазірдің өзінде Астана, Шымкент қалалары мен Жамбыл облысының ауруханаларында енгізіліп жатыр.

Фото: primeminister.kz

Жедел жәрдем жұмысына ерекше көңіл бөлініп жатыр: жүйе 2 100-ге жуық бригаданы және 3 800-ден аса медицина қызметкерін қамтуы тиіс.

Телемедицина саласы да дамып келеді. Жыл басынан бері 1 миллионнан аса телеконсультация жүргізіліп, оның игілігін 2,1 миллионнан аса адам көрді. Мұндай қызметтерді алушылардың шамамен 39 пайызы - ауыл тұрғындары.

Жоба ауылдардағы 655 фельдшерлік-акушерлік пункттер мен дәрігерлік амбулаторияларды, 72 қылмыстық-атқару жүйесі мекемелерін қамтиды.

1 қыркүйектен бастап қашықтықтан оқыту технологиялары мектеп оқушыларын медициналық тексеруден өткізу кезінде де қолданыла бастады. Алдағы уақытта 8 мыңға жуық мектепті қосу жоспарланған.

ЖИ диагностика уақытын төрт еседен аса қысқартты

Жасанды интеллект тікелей диагностикада барған сайын белсенді қолданылып келеді. ЖИ жүйелері 400-ден аса медициналық ұйымда компьютерлік және магниттік-резонанстық томографияны, сондай-ақ маммографияны талдау үшін пайдаланылып жатыр.

Денсаулық сақтау министрлігі мәліметінше, технологияларды қолдану диагноз қою уақытын төрт еседен аса қысқартуға мүмкіндік берді. Патологияларды ерте кезеңде анықтау көрсеткіші 32,2 пайызға өсті.

Бұдан бөлек, AKYLMED.AI платформасы дамып келеді. Ол дәрігерге онлайн жазылуға, скринингтерге шақырту алуға және кері байланыс қалдыруға мүмкіндік береді.

Ведомство мәліметінше, автоматтандырудың арқасында қабылдауға жазылып, бірақ келмеген пациенттердің саны үш есеге жуық азайды.

Премьер-министр Олжас Бектенов басты міндет жекелеген цифрлық шешімдерді енгізу ғана емес, оларды біртұтас жүйеге біріктіру екенін атап өтті.

"Президент бытыраңқы ақпараттық жүйелерден бас тартып, денсаулық сақтау саласының бірыңғай цифрлық негізін құру бойынша нақты мақсат қойды. Бұл міндетті жүзеге асыруға мүмкіндік беретін шешімдер мен технологиялардың бар екенін көріп отырмыз. Басталған жұмысты соңына дейін жеткізу маңызды. Барлық жүйелер біріктіріліп, деректер қолжетімді әрі өзекті болуға тиіс. Сондай-ақ тиімді ЖИ-шешімдерді бүкіл сала мен өңірлерге кеңінен таратқан жөн. Біз нақты нәтижеге қол жеткізуіміз керек, яғни медициналық қызметтердің сапасын арттырып, шығындарды оңтайландыру және әкімшілік кедергілерді жою қажет. Жаппай цифрландыру жүйені жетілдіруге, сол арқылы азаматтарға көрсетілетін қызметтердің тиімділігін арттыра түсуге мүмкіндік береді" - деді Олжас Бектенов.

Еске салайық, бұған дейін Бектенов Қазақстанның көлік саласына енгізіліп жатқан цифрлық шешімдермен танысқан болатын. Әңгіме автомобиль және теміржол тасымалында, сондай-ақ авиацияда жасанды интеллектіні қолдану туралы болып отыр.

Бізді Google-дың негізгі дереккөздер тізіміне қосыңыз

Қосу