1,7 мың адам жүргізуші куәлігінен айырылды

Елімізде медициналық қарсы көрсетілімдері бар адамдарды жүргізуші куәлігінен айыру процесі басталды. Денсаулық сақтау министрлігі мен Ішкі істер министрлігі өз дерекқорларын салыстырып, диспансерлік есепте тұрған 370 мыңға жуық адамды тексерді, деп хабарлайды Arasha.kz.

Тексеріс нәтижесінде 273 мың адамның мүлде жүргізуші куәлігі жоқ екені анықталды. Қалған 96 мың адамның ішінде:

41,6 мың адамның куәлігі бұған дейін-ақ жарамсыз болған;

54,3 мың адамның жүргізуші куәлігі әлі де күшінде болғанымен, денсаулық жағдайына байланысты көлік жүргізуге рұқсат етілмеген.

Бұл мәселе сот деңгейіне дейін жетті. 2025 жылдың желтоқсанындағы жағдай бойынша сотқа 4 540 талап арыз түсіп, соның нәтижесінде 1 787 адам жүргізуші куәлігінен айырылды.

Қазіргі уақытта Денсаулық сақтау министрлігі мен ІІМ арасындағы мәліметтер автоматты түрде жаңартылып отырады — психиатриялық және наркологиялық есептегі ақпараттар бірден ескеріледі.