Полиция көлігіне соғылған: Жамбыл облысында ер адам жүргізуші куәлігінен айырылды

АСТАНА, 12 қаңтар - Sputnik. Жамбыл облысы Шу ауданында мас жүргізуші жасырынуға тырысып, полиция көлігімен соқтығысқан, деп хабарлайды облыстық сот.

Шу аудандық соты мас күйде көлік жүргізген тұрғынның мәселесін қарады.

Оған әкімшілік құқық бұзушылық туралы Кодекстің 3-бөлігі, 613-бабының 1-бөлігімен іс қозғалған.

"Жүргізуші былтыр желтоқсанда Шу ауданы Төле би ауылының аумағында "Honda Odyssey" автокөлігін масаң күйінде басқарған. Полицияның тоқтату туралы заңды талабын елемей, ол жасырынуға тырысқан. Қарсы қозғалыс жолағына шығып, полицияның қызметтік көлігімен соқтығысқан", - дейді сотта.

Жүргізуші орта дәрежелі масаң күйде болған. Сотта құқық бұзушы кінәсін толық мойындап, оны қатаң жазаламауды сұрады.

Сот үкімімен жүргізуші 7 жыл мерзімге көлік құралдарын басқару құқығынан айырылып, 23 тәулік мерзімге әкімшілік қамауға алынды.