Димаш әлемді қазақша сөйлетті

Әлем қазақ тілін үйреніп жатыр. Лондонда өтетін Димаш Құдайбергеннің концертіне жиналған жүздеген жанкүйер Қазақстанның Халық әртісінің әндерін бірге орындап қана қоймай, қазақ тілін үйренуге құлшыныс танытуда. Олардың қатарында ойын қазақ тілінде еркін жеткізе алатындар көп.

Шетелдіктер жаппай қазақ тілін үйрене бастады. Олардың ұлы Абай тіліне деген махаббатын Димаш оятқан. Жанкүйерлер осылайша әлемге дарынды ұл сыйлаған қазақ халқына алғыс сезімін білдіргісі келеді. Сондай-ақ әншінің терең мағыналы әндерін түсінгісі бар.

Кәусар - Лондон мен Қызылорданың екі ортасында өскен 13 жастағы жаспөспірім қыз. Қос мәдениетті қатар алып жүр, ағылшын және қазақ тілдерінде еркін сөйлейді. Біраз уақыттан бері Димаш ағасының жанкүйерлеріне қазақ тілін оқытып жүр. Бұл жолы да дәстүрінен жаңылмай шетелдіктерге «Сәлем», «Қош келдіңіз», «Біз сені жақсы көремізден!» бастап, күрделі сөз тіркестеріне дейін үйретті.

Көпшілік үшін бұл жай ғана тіл үйрену сабағы емес, сүйікті әншісінің отаны - Қазақстанмен етене танысуға бағытталған алғашқы қадам. Курсқа қатысушылар арасында оңай сөздерді жаттап жүргендермен қатар, Ұлы Абай тілінде еркін сөйлейтіндер де бар.

Джанайна, жанкүйер:             

-  Менің қазақ тілін үйреніп жүрген себебім Димаштың шығармашылығын өте жақсы көремін. Димаш маған Қазақстанның мәдениетімен тереңірек танысуға себепші болды.

Джой, жанкүйер:

- Мен үш айдан бері қазақша үйреніп жүрмін. Димаш пен оның отбасына Қазақстанның бай мәдениетімен, ғажап тілімен және әсем музыкасымен таныстырғаны үшін шын жүректен алғысымды білдіргім келеді.

«Dimash UK Dears» - әр басқосуы отбасылық мерекеге ұқсайтын қауымдастық. Алғашқы кездесулерін олар 7 жыл бұрын ұйымдастырған. Сол уақыттан бері мұндай іс-шаралар игі дәстүрге айналды. Биылғы тойға 50 елден келген 350 жанкүйер қатысты.

Анка Тимофти, Dimash UK Dears Фан-клубының негізін қалаушы:

- Біздің клуб Ұлыбританияда мұндай шараны әлемде алғаш болып 2018 жылы өткізгенін айтуым керек. Біз өзімізді басқалармен салыстырмаймыз. Тек осы кешті ерекше, есте қаларлық етіп өткізгіміз келді. Мақсатымызға қол жеткіздік деп ойлаймын.

Димаштың тыңдармандары  үшін бұл жай ғана концерт алдындағы кездесу емес, жан тебірентер мереке. Осы күні британиялық музыканттар мен бишілер сахнаға шығып өнер көрсетті.

Ұлыбританиядағы ұлттық диаспорамыз да мерекеге өз үлесін қосты. Қазақ халқының асыл қазынасы — қос ішекті қара домбыраны құйқылжыта шертіп,  тарихы тереңде жатқан, сан ғасырлық шежіресі бар Ұлы даланың үнін жеткізді. Оның күмбірі Лондон мен Астананы жалғағандай болды. Артынша қыз ұзату рәсімі өткізілді. Ғасырлар бойы мазмұнын жоғалтпаған бұл салт-дәстүріміздің астарында қыз балаға деген құрмет, тектілік пен тазалық жатқаны айтылды.

Димаш үлкен концертке дайындалып жатқандықтан, жанкүйерлерімен жүздесуге келе алмады. Оның сәлемін ата-анасы мен қазақстандық өнер өкілдері жеткізді. Халық оларды ыстық ықыласпен және зор құрметпен қарсы алды.

Қанат Айтбаев, продюсер: 

Сіздермен әр кездескен сайын сіз бен бізге ортақ әртісіміз Димаш шабыттанып, керемет әндер жазады. Сіздердің керемет көрсеткен қолдауларыңызбен қанаттанып, қаншама шығарма жазғанын білсеңіздер.

Димаш пен оның командасының мемлекет арасында шекара болғанымен, достықта шекара болмаса екен деген асқақ арманы бар. Әлем бейбітшілік, келісім және тұрақтылық қағидаларына сәйкес өмір сүрсе екен деп тілейді. Алдағы үлкен концертте де осы ұлы ой ұрандатып емес, жүректерді біріктіретін әдемі дауыспен жеткізілмек.

Авторы: Ғалымжан Қараманұлы