Дінмұхаммед Қонаевтың туысы: Қазақстандағы белгілі энергетик Алтай Қадыржанов өмірден өтті

Қазақстан энергетика саласының көрнекті маманы, мемлекеттік қызметкер, ХХ ғасырдың әйгілі инженері Алтай Қадыржанов 83 жасында дүниеден өтті, – деп хабарлайды Aikyn.kz сайты.

Қаралы хабарды Дінмұхамед Қонаев халықаралық қоры жария етті.

Алтай Қадыржанов — КСРО-ның құрметті энергетигі, «Құрмет» орденінің иегері, еліміздің энергетика жүйесін дамытуға зор үлес қосқан маман. Қор мәліметінше, оның басшылығымен ірі энергетикалық нысандар жаңғыртылып, жылу және электрмен қамту жүйелері жүйеленген.

Хабарламада оның елдің энергетикалық инфрақұрылымын қалыптастыруға еңбек сіңірген буынның өкілі болғаны атап өтіледі. Кәсіби жолы адал қызметке, принципшілдік пен жауапкершілікке негізделген. Ол жеке мүддеден гөрі Отан игілігін жоғары қойған тұлға ретінде сипатталады.

Марқұмның Дінмұхамед Қонаевтың жиен інісі болғаны да айтылған. Соған қарамастан, ол ешқандай артықшылыққа сүйенбей, беделін тек білімі мен еңбегі арқылы қалыптастырған. Алтай Қамалұлы инженер әрі басшы ғана емес, кең дүниетанымды, мәдениет пен ғылымға жанашыр меценат ретінде де танылды.

Қор өкілдері марқұмның отбасы мен жақындарына, сондай-ақ Қазақстанның энергетика қауымдастығына көңіл айтып, қайғысына ортақтасатынын білдірді.