Белгілі ақын, журналист Ахметжан Срапилов өмірден өтті

Ахметжан Срапилов 1963 жылы 29-наурыз күні Алматы облысы Ұйғыр ауданының Кіші Ақсу ауылында дүниеге келген. 1980-жылы Илия Бахтия атындағы Шонжы ұйғыр орта мектебін, 1988-жылы Абай атындағы ҚазПИ ның филология факультетін бітірді.

Ахметжан Срапиловтың еңбек жолы Ұйғыр ауданының А.Розибакиев атындағы совхозда жұмыс атқарудан басталып, әр жылдарда республикалық «Коммунизм туғи» (қазіргі «Уйғур авази») газетінде корректор, «Жазушы» баспасынан шығатын ұйғыр тіліндегі «Пәрваз» альманахында редактор, Ұйғыр аудандық «Или вадиси - Ілі шұғыласы» газетінде әдебиет бөлімінің бастығы, жауапты хатшы, «Коммунизм туғи» (қазіргі «Уйғур авази») газетінің Ұйғыр және Панфилов аудандары бойынша меншікті тілшісі, 2002-2018 жылдары аталған газеттің әдебиет бөлімінің бастығы қызметтерін атқарды. 2019-2023-жылдар аралығында «Ижаткар» («Қаламгер») әдеби журналының бас директоры болды. 2023-жылдан өмірінің соңына дейін «Уйғур авази» газетінде әдебиет бөліміне жетекшілік етіп келді.

«Ахметжан Срапиловтың шығармашылығы өткен ғасырдың 80 ші жылдары басталып, «Қиранлар қияда яшайду», «Пуған», «Сарғайған хәтләр» кітаптары жарық көрді. Шығармалары қазақ, орыс, беларусь тілдеріне тәржімеленген. Ол аудармашы ретінде де танылған қаламгер еді. Жазушының шығармалары мектеп оқулықтарына енгізілген.

Өзіне ғана тән ерекшелігімен оқырманның жүрегіне жол тапқан, күндіз-түні аянбай еңбек етіп, өз тағдырын әдебиет пен журналистикаға арнаған Ахметжан Срапиловтың жарқын бейнесі есімізде мәңгі сақталады», делінген хабарламада.

Айта кетейік, Мәдениет және ақпарат министрлігі белгілі журналист, ақын, прозашы, Қазақстан Журналистер одағы сыйлығының лауреаты, «Ақпарат саласының үздігі» Жұмабек Айдарбекұлы Табынбаевтың дүниеден өтуіне байланысты отбасы мен туыстарына және әріптестеріне қайғыра көңіл айтқан еді.