Днепр тағы атқыланды: зардап шеккендер арасында балалар да бар

Ресей әскері 25 сәуір күні Днепр қаласына қайта соққы жасады,  - деп хабарлайды Aikyn.kz

Түні болған жаппай шабуылдан кейін бірнеше сағат өткен соң сол тұрғын аудан тағы да атқыланды. Соңғы мәлімет бойынша, бір адам қаза тауып, жеті адам жараланған. Облыс әкімшілігінің дерегіне сәйкес, соққы көпқабатты тұрғын үйге тиген.

Жаңартылған ақпаратқа сәйкес, жараланғандардың ішінде үш жасөспірім бар. 15 жастағы ұл мен 16 жастағы қыз ауруханаға жеткізілген, жағдайы орташа ауыр. Тағы бір 16 жастағы жасөспірім амбулаторлық ем алады. Жалпы жараланғандардың бесеуі ауруханада жатыр.

Соңғы уақыт ішіндегі шабуылдардан зардап шеккендер саны 34 адамға жеткен, бес адам көз жұмған. Қалада тұрғын үйлер, кәсіпорындар, көліктер мен дүкендер зақымданған, бір төртқабатты үй ішінара қираған. Украина билігі бұл шабуылдар азаматтық инфрақұрылымға бағытталғанын мәлімдеді.