Доллар бағамы сәуірден бергі ең төменгі деңгейге түсті

Қазақстандағы сауда-саттықта доллар бағамы 460 теңгеден төмен түсті. KASE-де 20 тамызда қандай курс қалыптасқанын Tengrinews.kz тілшісі хабарлайды.

Қазақстан қор биржасындағы (KASE) күндізгі сауда-саттық қорытындысы бойынша доллардың орташа бағамы 3,82 теңгеге төмендеп, 458,23 теңге болды. Айта кетейік, бұл доллар 460 теңгеден төмен түскен 2026 жылғы сәуірден бері ең төменгі деңгей.

Ұлттық банктің 20 тамызға арналған ресми бағамы 1 доллар үшін 462,22 теңгені құрайды.

Алматыдағы ақша айырбастау пунктеріндегі доллардың орташа бағамы сатып алу – 457,02 теңге; сату – 459,36 теңге. Астанадағы ақша айырбастау пунктеріндегі доллардың орташа бағамы сатып алу – орташа есеппен 457,00 теңге; сату – 464,00 теңге. Теңгеге не болып жатыр?

Бұған дейін сарапшылар Tengrinews.kz тілшісіне берген сұхбатында теңгенің нығаюын бірнеше фактормен түсіндірген болатын. Олардың қатарында шетелдік инвесторлардың ұлттық валютадағы активтерге деген жоғары қызығушылығы, сақталып отырған жоғары базалық мөлшерлеме және мұнай бағасының өсуі бар. Сондай-ақ экспорттық валюталық түсімдер мен Ұлттық банктің операциялары теңгеге қосымша қолдау көрсетті.

Бұл ретте мамандар қазіргі нығаю процесі уақытша болуы мүмкін екенін атап өтті. Қысқа мерзімді перспективада теңгенің әлі де күшеюге әлеуеті бар, алайда жыл аяғына қарай сарапшылар базалық мөлшерлеменің төмендеуі және ұлттық валютаны қолдайтын факторлардың әлсіреуі аясында теңге бағамы төмендейді деп болжайды.

Айта кетейік, тамыздың басында Ұлттық банк валюта нарығындағы жағдайға қатысты пікір білдірген еді. Сол кезде реттеуші қысқа мерзімді перспективада теңге динамикасы нарыққа қатысушылардың күтулеріне, тоқсандық салық төлемдеріне, әлемдік нарықтардағы ахуалға және геосаяси жағдайдың өзгеруіне байланысты болатынын түсіндірді.

Google News арқылы жаңалықтарымызды қадағалаңыз

Жазылу