Э. Макрон мен Си Цзиньпин нені ақылдасты?

Ал осы арада Эмманюэль Макрон мен Си Цзинпинь біраз мәселені жабық есіктің артында талқылап жатыр. Франция президенті Қытайға мемлекеттік сапармен барды. Макрон мен әйелі Брижит Макронды Қытай Халық Республикасының төрағасы Си Цзиньпин жұбайымен қарсы алды. Тараптар халықаралық саясат пен сауда қағидаттарын талқылап, көлік және энергетика салаларындағы бірқатар экономикалық келісімдерге қол қойды. Ұзынқұлаққа қарағанда Макрон Қытайға жасаған төртінші сапарында Си Цзиньпинді Украинадағы атысты тоқтату ісіне араласуға үгіттеген. 

Эммануэль Макрон, Франция президенті:

- Франция – Еуропаның стратегиялық автономиясын күшейтуге мүдделі мемлекет. Осы бағытта біз Қытаймен теңдікке және өзара құрметке негізделген тепе-тең қатынас орнатуға ниеттіміз. Алдағы қыс – нағыз шешуші кезең. Қанша инфрақұрылымдар, әсіресе энергетикалық нысандар әлі де Ресейдің шабуылдарына ұшырап отыр. Біз халықаралық құқықты сақтап, әділ әрі ұзақ мерзімді бейбітшілікке қол жеткізу үшін бірігуіміз керек.

Қытай – Францияның жетінші ірі сауда серіктесі. 2024 жылы Қытай импортының 10%-і Еуропалық Одаққа тиесілі болған. Ал экспорт көлемі 14%. Ел жыл сайын шамамен 35 млрд доллар көлемінде француз тауарларын сатып алады. Елисей сарайының мәлімдеуі бойынша доңыз еті мен сүт өнімдерінің жеткізілуіне қатысты қос ел арасында әлі де келіспеушіліктер бар. Екіжақты келіссөздер барысында Еуроодақтың сауда ережелерін қатаңдату жайы да талқыланды.