Эболаның өршуі: Қазақстан шекараны жаба ма

Уганда мен Конго Демократиялық Республикасында Эбола безгегінің өршуі басылмай тұр, соған байланысты ондаған ел санитарлық шараларды күшейтіп, келушілер үшін шектеулер енгізіп жатыр. TengriHealth редакциясы Қазақстанда шекараны жабу жоспары бар-жоғын және елде қауіпті инфекцияның таралу қаупі қалай бағаланатынын анықтады.

Уганда мен Конго Демократиялық Республикасында Эбола безгегінің өршуі басылмай тұр, соған байланысты ондаған ел санитарлық шараларды күшейтіп, келушілер үшін шектеулер енгізіп жатыр. TengriHealth редакциясы Қазақстанда шекараны жабу жоспары бар-жоғын және елде қауіпті инфекцияның таралу қаупі қалай бағаланатынын анықтады.

2 маусымда Уганда Денсаулық сақтау министрлігі X (Twitter) әлеуметтік желісінде Эбола безгегін жұқтырудың алты жаңа жағдайы туралы хабарлады. Осылайша, елде расталған жағдайлардың жалпы саны 15-ке жетті.

Ведомство мәліметінше, жаңадан ауырғандардың барлығы бұған дейін анықталған пациенттермен байланыста болғандар тобына жатады.

Мәлімдемеде қазіргі уақытта байланыста болған 668 адам бақылауда екені айтылған. Ауруханадан екі адам шығарылды, 12 пациент емделіп жатыр, бір адам қайтыс болды.

Конго Демократиялық Республикасында жағдай әлі де күрделі, дегенмен жақында шетелдік БАҚ бес пациенттің сауығып кеткенін хабарлады.

Дүниежүзілік денсаулық сақтау ұйымы 27 мамырдағы жағдай бойынша Конго ДР-да ауру жұқтырды деген күдікпен 906 жағдай және солардың ішінде 223 өлім тіркелгенін мәлімдеді.

Кейін Конго ДР билігі зертханалық түрде расталған жағдайлар саны 282-ге дейін өскенін хабарлады. Сондай-ақ 42 өлім жағдайы тіркелді. Тек кейінгі күндері мамандар тағы 19 оң жаңа нәтижені анықтады.

Ұлттық қоғамдық денсаулық сақтау орталығының Қоғамдық денсаулық сақтау саласындағы төтенше жағдайлар жөніндегі жедел орталығы Қазақстан Эбола індетіне байланысты шекараны жабуды жоспарлап отырмағанын хабарлады.

Мамандар ел ұстанымы Дүниежүзілік денсаулық сақтау ұйымының ұсынымдарына сәйкес келетінін атап өтті.

"ДДСҰ халықаралық сапарларға немесе саудаға тыйым салуды ұсынбайды және індет таралмаған, сондай-ақ зардап шеккен аймақтармен шектеспейтін елдерді халықаралық қатынасқа артық кедергі келтіретін шаралардан аулақ бола отырып, жаңа жағдайларды анықтау және дереу оқшаулау қабілетін күшейтуге шақырады", - деп хабарлады дәрігерлер.

Ведомство Қазақстанның Эбола індеті тіркелген елдермен тікелей әуе қатынасы жоқ екенін еске салды.

"Шекара ашық болады, ал әуежайлар мен шекара бекеттеріндегі санитарлық-карантиндік бақылау бұрыннан жұмыс істеп тұрған тұрақты механизм аясында қамтамасыз етіледі", - деп атап өтті мамандар.

Ұлттық қоғамдық денсаулық сақтау орталығының мәліметінше, Қазақстан халқы арасында инфекцияның таралу қаупі қазіргі уақытта төмен деңгейде қалып отыр.

Бұл ретте мамандар халықаралық мобильділік жағдайында аурудың әкеліну ықтималдығын толығымен жоққа шығару мүмкін емес екенін баса айтады.

Бұған дейін Африкада Эбола безгегінің өршуіне байланысты саяхат индустриясы қиындықтарға тап болғаны туралы жазған болатынбыз. Ондаған елдің билігі 30 күн кіруге тыйым салудан бастап, барлық келушіге үш апталық міндетті карантинге дейін қатаң шектеулер енгізді. Шектеу енгізген мемлекеттер тізімін мына жерден көруге болады.

Тағы оқыңыз: ДДСҰ Эболаға байланысты халықаралық дабыл жариялады: бұл Қазақстан үшін нені білдіреді?

Google News арқылы жаңалықтарымызды қадағалаңыз

ауру

Безгек

Денсаулық

шектеу