Егемендікпен ертеңімізге деп аталған рухани кеш өтті

Республика күні қарсаңында Алматыдағы «Орталықтандырылған кітапхана жүйесіне» қарасты №31 кітапхананың ұйытқы болуымен «Егемендікпен – ертеңімізге» деп аталған рухани-танымдық кеш өтті. Мазмұнды басқосу қазақ журналистикасының көрнекті өкілі Марат Тоқашбаевтың шығармашылығына арналып, қабырғалы қаламгердің бестомдық шығармалар жинағы таныстырылды, деп хабарлайды Egemen.kz.

«Уақыт жебесі» атты бестомдық ел өмірінің соңғы отыз жылдағы маңызды тұстарын қамтиды. Оның алғашқы томы мемлекеттегі қоғамдық-саяси өзгерістерді екшеуге, саяси баға беруге бағытталса, «Тұғыры биік тұлғалар» деп аталған екінші томдыққа автордың баспасөз беттерінде ұлт тарихынан ойып орын алатын тарихи тұлғалармен өрбіген сұхбаттары мен мақалалары енген. «Алапат соғыс ақиқаты» деп аталған үшінші кітап сұрапыл соғыс кезеңінің қазақ оқырманына бұрын беймәлім, құпия тұстарын ашып, қайсар жауынгерлердің ерлігі мен өмір өрнегінен сыр шертеді. Ал, «Диалогтар дүбірі», «Отбасылық өрнек» деп аталған келесі кітаптардың да оқырманға берері мол.

Жылы жүздесуде кеш қонағы көрермендер сұрағына жауап беріп, тәуелсіздіктің қадір қасиеті, Егемендік декларациясы қабылданған тұстағы тарихи оқиғалар туралы баяндап, ұлт мұраты, ұрпақ тәрбиесіне қатысты орамды ойларын ортаға салды.

Бүгінде кең қолданысқа енген  «Ақорда», «Елтаңба» (герб), «Әнұран» (гимн), «Елорда» (столица), «Доғарыс» (отставка), «Кәдесый» (сувенир),  «Пікіртерім» (опрос),  «Оқтұмсық» (боеголовка), «Тосынсый» (сюрприз), «Нөпір шақ» (час пик), «Айлабұйым» (приспособление), «Заңастар құжаттар» (подзаконные акты) т.б. ондаған сөздер мен тіркестердің авторы Марат Байділдәұлы ұлттық баспасөз бен телевизияда жетекші қызметтер атқарып, ұлт руханияты мен мәдениетіміздің дамуына сүбелі үлес қосып келеді.

Іс-шараны  жүргізген «Орталықтандырылған кітапхана жүйесіне» қарасты №31 кітапхананың меңгерушісі Гүлмира Бағытқызы, мұндай тағылымды тұлғалармен жүздесу жастардың бойына жігер беріп, олардың бойындағы мемлекетшілдік рухын асқақтатуға серпін беретінін атап өтті.

«Марат Байділдәұлының ұлттық-демократиялық көзқарастары, әсіресе, көрнекті қаламгер Ақселеу Сейдімбек басқарған «Білім және еңбек» журналында  қызмет істеген  1982 - 1989 жылдары қалыптасты. Зиялы қауымның азаттықты аңсаған Мұрат Әуезов, Сәбетқазы Ақатаев, Мақаш Тәтімов, Марат Сенбин сияқты алғыр ойлы өкілдерімен танысу, пікірлесу оның ұлт азаттығы, қазақ халқының өзін өзі билеуі, ұлттық демократиялық өзгерістер жөніндегі ой-тұжырымдарын нығайта түсті. Әлкей Марғұлан, Нұртас Оңдасынов, Орынбек Жәутіков, Рахманқұл Бердібаев, Мардан Бәйділдаев, Жағда Бабалық сияқты ғұлама ғалымдармен кездесу ұлттық құндылықтарға деген құрметін тереңдетті. Жасы 75-ке келсе де ұлт руханиятына қалтқысыз қызмет етіп келе жатқан қаламгер кеш қонақтарының көкейінде жүрген маңызды сауалдарға жауап беріп, көрерменге жігер сыйлады»,- дейді Гүлмира Бағытқызы.

Әсерлі кеште Құрманғазы атындағы Қазақ ұлттық консерваториясы воколдық өнері  кафедрасының  профессоры Сауле  Нұрғалиова, Кемел ықшам ауданындағы  «Белсенді өмір сүру» орталығының  мүшелерінен құралған  «Беу, айдай» әжелер ансамблі өнер көрсетті. Жиналғандар сондай-ақ, Марат Байділдәұлының шығармашылығы мен өмір жолынан сыр шертетін фотосуреттер көрмесін тамашалады.