Экс депутат Базарбек өзінің қатысуымен болған ЖКО дан кейін алғаш рет пікір білдірді

Мәжілістің бұрынғы депутаты Бақытжан Базарбек өзінің қатысуымен болған, ер адам зардап шеккен жол апатына қатысты алғаш рет пікір білдірді. Бұл туралы ол Facebook-тегі парақшасында жазды, деп хабарлайды Tengrinews.kz.

Базарбектің айтуынша, сотқа дейінгі тергеп-тексеру аясында ол және оның жұбайы жария етпеу туралы қолхатқа қол қойған, сондықтан көп нәрсені жаза алмайды.

"Тергеу амалдары жалғасып жатыр. Қазір қажетті сараптамалардың жүргізілуі күтілуде. Тергеп-тексеру органдары заң талаптарына сәйкес болған оқиғаның барлық мән-жайына объективті әрі әділ баға береді деп сенемін", - делінген жазбада.

Сондай-ақ экс-депутат ол үшін қазіргі ең басты мәселе - зардап шеккен азаматтың жақындары мен туыстарының қасында болу және оларға қажетті көмек көрсету екенін айтты.

"Біз бірнеше күн бойы іс жүзінде ұйықтамай, оның туған-туыстарымен бірге оның сауығып кетуін тілеп, дұға жасап отырмыз. Көрсетілген шұғыл медициналық көмек үшін аудандық аурухананың барлық дәрігеріне, сондай-ақ Денсаулық сақтау министрлігі мен облыстық денсаулық сақтау басқармасына ерекше алғысымды білдіремін", - деп жазды ол.

Әлеуметтік желілердегі болжамдар мен пікірлерге қатысты Базарбек асығыс қорытынды жасамауға және тек ресми ақпарат пен тергеу нәтижелеріне сенуге шақырды. Сонымен қатар, экс-депутат "осы қиын күндерде алаңдап, қолдау көрсетіп жатқан баршаға" алғыс айтты.

16 тамызда Telegram-арналардың бірінде Жамбыл облысы Рысқұлов ауданында жол-көлік оқиғасы болғаны туралы жазба жарияланды. Ұсынылған ақпаратқа сәйкес, Батыс Еуропа - Батыс Қытай тасжолында 36 жастағы жаяу жүргіншіні қағып кеткен. Көлік тізгінінде Мәжілістің экс-депутаты Бақытжан Базарбек болғаны айтылды.

Кейін Жамбыл облыстық денсаулық сақтау басқармасы зардап шеккен азаматтың жағдайы өте ауыр екенін хабарлады.

Google News арқылы жаңалықтарымызды қадағалаңыз