Елде жемқорлыққа қарсы реформалардың орындалу барысы сарапталды

Жиында Мемлекеттік қызмет істері агенттігі және Әділет министрлігі басшылығының баяндамалары тыңдалды.

Мемлекеттік кеңесші Ерлан Қарин сыбайлас жемқорлыққа қарсы іс-қимылды жетілдіру бағытында қабылданып жатқан шаралардың маңызына тоқталып, елдегі прогрессивті өзгерістерге назар аударды.

— Сыбайлас жемқорлыққа қарсы іс-қимыл мәселелері жөніндегі комиссияның бүгінгі отырысы тарихи оқиғадан кейін ұйымдастырылып отыр. 15 наурызда өткен жалпыхалықтық референдумда ел азаматтарының басым дауысымен жаңа Конституция қабылданды. Жаңа Ата заң «мемлекет адам үшін» моделіне көшуді бекіткен маңызды қадам болды. Осылайша, адамның құқықтары, бостандықтары мен мүдделері мемлекеттік саясаттың негізгі басымдығына айналды. Жаңа Конституцияда саяси құрылым, экономика, әлеуметтік саясат секілді басқа да салалар мен бағыттарды кеңінен қамтитын маңызды жаңашылдықтар көп. Сыбайлас жемқорлыққа қарсы күрес саясатына қатысты новеллалар да бар. Мәселен, жаңа Конституцияда сыбайлас жемқорлыққа қарсы шектеулер айтарлықтай күшейтілген. Айталық, 35-бапта сыбайлас жемқорлыққа қатысты қылмысы немесе құқық бұзушылығы сот арқылы мойындалған адамдардың мемлекеттік органдар мен жергілікті өзін-өзі басқару органдарына сайлануға құқығы жоқ екені көрсетілген. Бұл норма алғаш рет конституциялық деңгейде бекітілді, — деді Ерлан Қарин.

Мемлекеттік кеңесші аталған реформалар Ұйыммен алдағы келіссөздер кезеңінде салмақты негіздеме болатынын айтты.

Ерлан Қарин сыбайлас жемқорлыққа қарсы күрес саласында халықаралық әріптестікті, соның ішінде GRECO аясында кеңейтудің мәні зор екеніне назар аударып, еліміздің ұлттық мүддесі басымдық болып қала беретінін еске салды.

Мемлекеттік кеңесші «Заң және тәртіп» қағидатын одан әрі нығайту сыбайлас жемқорлыққа қарсы күрестегі барлық бағдарламаны іске асыру барысындағы маңызды бағыт ретінде сақталатынын атап өтті.

Бұған дейін Мемлекеттік кеңесші Ерлан Қарин Президенттің «Таза Қазақстан» бастамасын жүзеге асыру мәселелері жөнінде жиын өткізген болатын.