Елге танымал актриса, Халық әртісі 84 жасына қараған шағында көз жұмды (ФОТО, ВИДЕО)

Ресейдің халық әртісі, театр және кино актрисасы Вера Алентова 84 жасында дүниеден өтті. Қайғылы хабарды актриса бүкіл шығармашылық жолын арнаған Мәскеу Пушкин атындағы драма театры растады, деп Arasha.kz тілшісі ТАСС агенттігіне сілтеме жасап хабарлайды.

Вера Алентова (қыз кезіндегі тегі – Быкова) 1942 жылғы 21 ақпанда Котлас қаласында актерлер отбасында дүниеге келген. Әкесі ерте қайтыс болған соң, ол анасы екеуі түрлі қалаларда өмір сүрді. Болашақ актриса мектепті Барнаул қаласында аяқтаған. Алғашқы театрлық маусымын Орск қаласында өткізген Алентова кейін кәсіби білімін жалғастыру үшін Мәскеуге аттануды ұйғарады.

1961 жылы Вера Алентова Мәскеуге көшіп, МХАТ мектеп-студиясына оқуға түседі. 1965 жылы оқуын тәмамдаған соң, сол жылы Пушкин атындағы Мәскеу драма театрының труппасына қабылданды. Бұл театрда ол өмірінің соңына дейін қызмет етіп, ондаған жарқын рөлдерді сомдап, сахнаның жетекші тұлғаларының біріне айналды.

Актрисаның кино саласындағы дебюті 1965 жылы өтті. Алайда шын мәніндегі бүкілхалықтық әрі халықаралық танымалдылықты оған режиссер Владимир Меньшов түсірген "Москва слезам не верит" фильміндегі басты рөлі әкелді. 1979 жылы жарық көрген бұл туынды әлемдік деңгейде мойындалып, Вера Алентованың есімін отандық әрі жаһандық кино тарихында мәңгі қалдырды.