Елордадағы ең танымал мұз айдыны EXPO кешенінде орналасқан

Елордадағы EXPO іскерлік кешені аумағында ең танымал мұз айдыны өз жұмысын бастады.

Оның жалпы ауданы 1 300 шаршы метрді құрайды. Онда күніне 400 адам коньки тебе алады. Мұз айдыны Астана тұрғындары мен қонақтары үшін сүйікті демалыс орындарының біріне айналмақ. 

«QazExpoCongress» ұлттық компаниясы жыл сайын елорда тұрғындары мен қонақтары үшін EXPO іскерлік кешені аумағында қысқы іс-шаралар ұйымдастырады. Жаңа жылдық безендірулерден кейін кешен мүлде жаңа кейіпке енеді. Ерекше жарық шамдармен айшықталған демалыс орны елордалықтарды мерекелік көңіл-күйге бөлейді.

Қайыржан Ақсимов, Астана қаласының тұрғыны:

- Менің ұлым 7 жаста, ол мені үнемі осында алып келеді. Біз отбасымызбен жиі келіп, демаламыз. Жұбайым балалармен бірге коньки тебеді, ал үлкен ұлым мұз айдынында сырғанақта жүреді. EXPO аумағындағы бұл орын маған өте ұнайды. Мұнда демалуға арналған керемет аймақтар бар.

Экспо аумағындағы мұз айдыны 8 жылдан бері жұмыс істеп келеді. Жұртшылаққа ыңғайлы болу үшін қажетті қызмет түрлері қолжетімді етілген. Мәселен, суықта тоңған келушілер үшін шай мен кофе бар, ал демалыс күндері мұз айдыны үздіксіз жұмыс істейді. Мерекелік күндері мұз айдыны түскі 12:00-ден кешкі 22:00-ге дейін, ал демалыс күндері таңғы 10:00-ден түнгі 23:00-гге дейін қызмет көрсетеді.

Аружан, мұз айдынының әкімшісі:

- Бізде конькидің құны бір сағатқа 2 мың теңге, жарты сағатына 1,5 мың теңге. Егер балалар айдай алмаймын, қорқамын десе қасында көмекшілер болады. Олар мың теңгеден жалға беріледі және әртүрлі өлшемдері бар, 26-47-ге дейін жүреді.

EXPO іскершік кешені аумағында демалушыларға арналған сырғанақтар жұмыс істейді. Биіктігі 5 метр болатын төбешіктерде тюбингпен сырғанауға болады. Оны 30 минутқа жалға алу құны – 1500 теңге. Сырғанақтар күн сайын сағат 11:00-ден түнгі 02:00-ге дейін қызмет көрсетеді.