Қырғызстандағы ең ұзын тоннель орналасқан жол уақытша ашылады

Қырғызстанда 1 маусым мен қараша аралығында «Солтүстік – Оңтүстік» балама автожолы уақытша пайдалануға беріледі.
Бұл туралы елдің Көлік және коммуникациялар министрлігі хабарлады. Ведомство мәліметінше, туристік маусым кезінде жолдың уақытша ашылуы қолданыстағы бағыттарға түсетін жүктемені азайтуға мүмкіндік береді. Алайда жүргізушілерге көлік құралдарының осьтік жүктемесі 11,5 тоннадан аспауы тиіс екені ескертілді.

Жобаның негізгі нысандарының бірі – Көк-Арт асуының астымен өтетін тоннель. Ұзындығы 3890 метр болатын бұл нысан Қырғызстандағы ең ұзын тоннель саналады.

Тоннельдің ені 10–14 метр аралығында, биіктігі 8,6 метр, ал жүру бөлігі 8,5 метрді құрайды. Сондай-ақ екі жағынан жаяу жүргіншілерге арналған өткелдер қарастырылған.

Нысан теңіз деңгейінен 2521 метр биіктікте орналасқан және толық пайдалануға дайын. Қауіпсіздік талаптарына сәйкес әр 300 метр сайын апаттық эвакуация шығатын жолдар салынған. Бұдан бөлек, негізгі тоннельмен қатар ені 4 метр болатын арнайы жерасты эвакуациялық дәлізі жүргізілген.

Жалпы ұзындығы 433 шақырым болатын «Солтүстік – Оңтүстік» автожолының шамамен 200 шақырымы бұрын жол болмаған аумақтар арқылы салынған. Жоба аясында екі эстакадалық көпір мен елдегі ең ұзын тоннель бой көтерді.

Министрлік мәліметінше, жол толық іске қосылғаннан кейін Жалал-Абад пен Балықшы қалалары арасындағы жол жүру уақыты қазіргі 13 сағаттан шамамен 6 сағатқа дейін қысқарады.

Қазір жолдың кейбір бөліктерінде көшкін мен селден қорғайтын инженерлік нысандардың құрылысы жалғасып жатыр. Осыған байланысты автожол әзірге маусымдық режимде пайдаланылады. Жоба толық аяқталып, 2028 жылы пайдалануға беріледі.