Энергетика саласындағы жүйелі трансформация

«Astana Hub» алаңында Энергетика министрі Ерлан Ақкенженовтің бұқаралық ақпарат құралдары өкілдерімен кеңейтілген кездесуі өтті. Ведомство басшысы отын-энергетика кешенінің есепті жылдағы қорытындыларын ұсынып, бұл кезеңді дағдарысқа қарсы басқаруды аяқтап, ауқымды стратегиялық міндеттерді іске асыруға көшу уақыты ретінде сипаттады. Үкімет брифингі жаңа «Town hall» форматында ұйымдастырылғанын атап өткен жөн. Алғашқысын Энергетика министрлігі бастады.

Кездесуді аша отырып, Ерлан Ақкенженов Мемлекет басшысының тапсырмаларын орындау саланың дамуына деген көзқарастың түбегейлі өзгеруін талап еткенін атап өтті. «2025 жылдың қорытындысын шығара отырып, біз бұл жылды саланың жүйелі трансформация кезеңі деп сеніммен айта аламыз. Өтіп бара жатқан жыл сапалы құрылымдық өзгерістермен ерекшеленді: индустриялық алыптарды іске қосудан бастап әрбір пәтер­ді тұрақты жылумен қамтамасыз етуге дейін. Басты мақсат — елдің экономикалық егемендігінің іргетасы саналатын энергетикалық қауіпсіздікті нығайту»,  деді министр өз сөзінде.

Мұнай-газ саласындағы бас­ты оқиға — Теңіз кен орнындағы Бола­­шақ кеңейту жобасының то­лық аяқталуы болды. Үшінші буын зауы­­­тының іске қосылуы жыл сайын 12 млн тонна көлемінде қо­сым­­ша мұ­най өндіруге мүм­кін­­дік беріп, ұлт­тық экономика үшін ұзақмер­зімді әрі қуатты экс­порттық кіріс көзін қалыптастырады.

Баяндамасында ведомство басшысы өңдеу саласы мен жанар-жағармай нарығына ерекше назар аударды. Оның айтуынша, бағаны қолмен реттеуден бас тартып, нарықтық тетіктерге көшу саланы сауықтырып, отын тапшы­лығының алдын алуға мүм­кіндік берді. Болашаққа тоқта­ла келе, Министр 2040 жылға дейінгі бекітілген өндірістік бағдарларды атап өтті, олар үш қағидаға негіз­делген: қуат, сапа және ғылым.

«Біз мұнай өңдеу көлемін қазіргі 18 млн тоннадан жылына 39 млн тоннаға дейін жеткізуді мақсат етіп қойдық. Ол үшін қолданыстағы үш мұнай өңдеу зауытын кеңейту көзделген», деді Е.Ақкенженов.

2025 жылы CaspiBitum зауытын жаңғырту аяқталып, оның қуаты 1,5 есеге артты, ал битум өндірісі 750 мың тоннаға жетті. Сонымен қатар Шымкент, Атырау және Павлодар зауыттарын кеңейту жұмыстары жалғасуда, сондай-ақ қуаты 10 млн тонна болатын төртінші МӨЗ салу үшін инвесторлар тарту мәселесі пысықталып жатыр.

Электр энергетикасы мен жылумен қамту мәселелеріне тоқтал­ған министр көпжылдық теріс үрдістің еңсерілгенін мәлімдеді. «Тариф — инвестицияға айырбас» қағидатының тиімділігінің арқасында стансаларды жөндеуге салынған инвестициялар 20%-ға артты. Нәтижесінде, 323 шақырым жылу желісі жөнделіп, апаттылық деңгейі төрттен біріне төмендеді.

Сондай-ақ ол елдің энерго­жүйесі рекордтық 118 млрд кВт·сағат электр энергиясын өндір­генін, Топар мен Текелі нысандарында жаңа қуат­тардың іске қосылғанын атап өтті.

Газ саласында министрлік ресурс базасын нығайту және ауқым­д­ы әлеуметтік газдандыру бо­йынша атқарылған жұмыстарды баяндады. Хайркелді, Тұзкөл және Тасболат атты үш жаңа кен орны пайдалануға берілді, ал халықты газбен қамту деңгейі 64,2%-ға жетті (қосым­ша 350 мың адам қосылды). Негіз­гі инфрақұрылымдық жетіс­тік ретінде «Талдықорған – Үшарал» ма­гистральдық газ құбыры­ның мер­зі­мінен бұрын іске қосылуы аталды.

«Мемлекет инфрақұрылымды дамытуға 112 млрд теңгеден астам қаржы бағыттады. Табиғи газ елдің ең шалғай өңірлеріндегі тұрғындар үшін қолжетімді игілікке айналды», деді министр.

Сонымен қатар әртараптандыру бағытындағы жетістіктер де атап өтілді: мұнай-газ химиясы секторы 12%-ға өсті, Атырауда полиэти­лен, Павлодарда алкилаты зауыт­тары­ның құрылысы басталды. Жасыл энер­гетикада қуаты 266 МВт болатын жобалар іске қосылып, ЖЭК үлесі 7%-дан асты, сондай-ақ қуаты 1 ГВт бо­латын жел электр стансасын салу­ға ар­налған тарихи аукцион өткізілді.

Кездесу соңында Ерлан Ақкен­женов EnergyTech жүйесін және жа­сан­ды интеллектіні енгізу арқы­лы жү­зеге асырылып жатқан цифр­лық транс­формация туралы айтты. Оның сөзінше, электр беру желі­лерін тексеруде дрондарды, ал құ­быр­ларды диагностикалауда робот­тар­ды қолдану өз тиімділігін көрсетіп отыр.

«Енгізіліп жатқан құралдар тәжі­рибеде өз нәтижесін дәлел­деуде. Негізгі міндеттер – әуе желілеріндегі ақауларды анықтау және жылу желілерінің ішкі диагностикасы. Бұл бағыттағы экономикалық тиім­ділік ондаған миллиард теңгемен өлшенеді», деп түйіндеді Энергетика министрі.

Соңғы жаңалықтар

Футболдан 2026 жылғы Әлем чемпионатының жүлде қоры жарияланды

Футбол • Бүгін, 12:08

Қасым-Жомарт Тоқаев Мейджи Джингу ғибадатханасын аралап көрді

Президент • Бүгін, 11:51

«Astana Motors»: Отандық көлік өнеркәсібіндегі серпіліс

Технология • Бүгін, 11:42

Цифрландыру, инфрақұрылым және активтердің қайтарылуына ел тұрғындарының көзқарасы қандай?

Қоғам • Бүгін, 11:40

Еуроодақ ресейлік газдан бас тарту туралы шешім қабылдады

Оқиға • Бүгін, 11:35

«Жетісу» футбол клубына бас бапкер тағайындалды

Футбол • Бүгін, 11:25

Атырау облысында аңшы жоғалып кетті

Оқиға • Бүгін, 11:13

Димаш Құдайберген медицина университетінің құрметті профессоры атанды

Қоғам • Бүгін, 11:01

Қазақстанда бағдарламалау мектебі ашылды

Білім • Бүгін, 10:51

Кеңгір ауылы газға қосылып, таза ауыз сумен қамтылды

Қоғам • Бүгін, 10:40

Алматы метросының «Қалқаман» станциясы мерзімінен бұрын пайдалануға беріледі

Оқиға • Бүгін, 10:33

Бала саны сегізден асса, жәрдемақы мөлшері қалай өзгереді?

Қоғам • Бүгін, 10:20

Сақ болыңыз: Алаяқтар тұрғындарды алдауда жаңа тәсіл қолданып жатыр

Қоғам • Бүгін, 10:15

Түркістан облысында көпір опырылып қалды

Аймақтар • Бүгін, 10:11

18 желтоқсандағы валюта бағамы қандай?

Қаржы • Бүгін, 10:01

Барлық жаңалықтар