Ербол Хамитов Паралимпиададағы алғашқы алтын медальді жеңіп алды

Ербол Хамитов Паралимпиада 2026 ойындарында парабиатлоннан алтын медаль жеңіп алды, - деп хабарлайды Tengrinews.kz тілшісі.

Ербол Хамитов Паралимпиада 2026 ойындарында парабиатлоннан алтын медаль жеңіп алды, - деп хабарлайды Tengrinews.kz тілшісі.

Жарыста қазақстандық спортшы бірінші нәтиже көрсетіп, ең жақын қарсыласынан 10 секундқа озып шыққан. Алайда спортшылардың санаттары әртүрлі болғандықтан, ол жарысты көшбасшы ретінде бастамады.

Жарыс барысында Хамитов алғашқы атыс кезеңінен кейін-ақ көш бастады. Нысаналарды дәл көздеп, бірінші орынмен алға шықты.

Екінші атыс кезінде қазақстандық спортшы бір рет қателескенімен, қарсыластары да дәлдік таныта алмады. Соның нәтижесінде Хамитов мәреге дейінгі қашықтықта 20 секундтық басымдықпен алға шығып кетті. Ақырында ол жарысты бірінші болып аяқтап, алтын медаль иеленді.

Айта кетейік, парабиатлондағы бұл жүлде Хамитов үшін осы Паралимпиададағы екінші медаль болды. 10 наурызда ол шаңғы спринтінде қола медаль жеңіп алып, Қазақстан қоржынына Италиядағы алғашқы жүлдені салған еді.

Ербол Хамитов бала кезінен спортпен айналысқан. 19 жасында оқ жарақатынан аяғынан айырылғанына қарамастан, спортты тастамады.

2017 жылы ол грэпплингтен Қазақстан кубогының жүлдегері атанды. Кейін қысқы спорт түрлерінде үлкен жетістіктерге жетті.

2023 жылы пара шаңғы жарысынан әлем чемпионы атанса, 2025 жылы парабиатлоннан әлем чемпионатында алтын медаль жеңіп алған алғашқы қазақстандық болды.

Айта кетейік, Италияда өтіп жатқан Паралимпиада ойындары 15 наурызда аяқталады. Ербол Хамитов әлі де 20 шақырымдық шаңғы жарысына қатысады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!