Ерейментау тұрғындары апат салдарынан сусыз қалды

Ақмола облысы Ерейментау қаласының тұрғындары әлеуметтік желілерде ұзаққа созылып кеткен мәселеге шағымданды: бір айдан астам уақыт бойы олардың пәтерлерінде қалыпты су деңгейі қамтамасыз етілмеген. Су краннан аздап қана ағады немесе мүлдем тоқтап тұр.

Тұрғындардың айтуынша, судың қысымы тұрмыстық қажеттіліктерді қамтамасыз етуге жеткіліксіз: жуыну, тамақ дайындау, киім жуу мүмкін емес.

Ерейментау ауданы тұрғын үй-коммуналдық шаруашылық бөлімі хабарлағандай, 2026 жылы 13 ақпанда «Жапон гранты» аясында салынған су көтергіш мұнарада апат болған. Салдарынан суды қамтамасыз ететін майлы трансформаторлар істен шыққан көрінеді.

— Апат салдарын жою мақсатында заңнамамен белгіленген тәртіп бойынша мемлекеттік сатып алу конкурсы өткізілді. Нәтижесінде мердігер ұйым ретінде «Кентау трансформатор зауыты» таңдалды. Қазіргі таңда зауыт жаңа трансформаторларды жасап, Кентау қаласынан жөнелтті. Қазір олар жолда, — деп хабарлады тұрғын үй-коммуналдық бөлімнен.

Қазіргі уақытта қаладағы су құбыры жүйесі шектеулі режимде жұмыс істеп тұр. Су желісіндегі қысым шамамен 2,9 атмосфера құрайды. Әкімшілік өкілдерінің айтуынша, бұл минималды шекті деңгей. Дегенмен, бұл әсіресе көпқабатты үйлердің жоғарғы қабаттарына тұрақты су қысымын қамтамасыз етуге жеткіліксіз.

Еске салсақ, бұған дейін Өскеменде су құбырының тесілуінен тұрғын үйлердің қабырғалары жарылып жатқаны анықталды.