Оралда құбырдағы апат салдарынан 400 абонент сусыз қалды

«Батыс су арнасы» ЖШС-дан мәлім еткеніндей, 16 ақпан күні «Қазақтелеком» АҚ-ның мердігер ұйымы жер қазу жұмыстарын жүргізу кезінде диаметрі 225 мм су құбырын зақымдаған.

Жақын маңдағы жеке тұрғын үйлерді су басудың алдын алу және құбырдағы апатты жою жұмыстарын жүргізу үшін осы маңдағы мекенжайларға су беру уақытша тоқтатылды. Атап айтқанда, Исатай-Махамбет көшесі 82, 84, А.Тайманов көшесі 109, Ж.Досмұхамедов көшесі 8, Ә.Кекілбаев көшесі 139, Д.Нұрпейісова көшесі 10, 8 наурыз көшесі 109-мекенжайындағы көпқабатты үйлер, сондай-ақ С.Есқалиев, Ә.Кекілбаев, Ж.Досмұхамедов көшесі бойындағы жеке тұрғын үйлер сусыз қалды.

Қазіргі кезде апатты қалпына келтіру жұмыстары жүргізіліп жатыр.

«Батыс су арнасы» ЖШС директоры Әнуар Әркеновтің нақтылауынша, барлығы 400 абонент сусыз отыр.

Осыған орай тұрғындар алаңдаушылық білдіріп жатыр. Олардың бірі үйінде суға қоса жылу жоқтығын айтса, екіншісі мұндай жағдайдың бұдан бұрын да болғандығын жеткізді.

- Енді суды қашан береді? Колонкалар жұмыс істемейді. Бұл не масқара? Біресе «Қазақтелеком» кінәлі, біресе «Облгаз» («ҚазТрансГазАймақ» АҚ Батыс Қазақстан өндірістік филиалы). Халық қайда барады? – деп жазды Лунара Сүйінғалиева.

Еске сала кетейік, бұдан бұрын Оралда құбырдың істен шығуына байланысты Зачаган кенті сусыз қалғанын жазған едік.