Ерлан Қарин: Жаңа конституциялық заңдар саяси жүйені жаңғыртуға жол ашады

Мемлекеттік кеңесші Ерлан Қарин қабылданған конституциялық заңдар пакеті елдегі саяси реформалардың құқықтық базасын нығайтатынын мәлімдеді.

Оның айтуынша, Парламент палаталарының бірлескен отырысында қаралған заң жобалары мемлекеттік басқару жүйесін жаңғыртуға және қоғамның саяси үдерістерге қатысуын кеңейтуге бағытталған.

– Қабылданған конституциялық заңдар пакеті саяси реформалардың жүйелі түрде жүзеге асуына құқықтық негіз қалыптастырады. Бұл өзгерістер мемлекеттік институттардың тиімділігін арттырып, азаматтардың шешім қабылдау процестеріне қатысу мүмкіндігін кеңейтеді, – деді Ерлан Қарин.

Мемлекеттік кеңесші жаңа заңдар қоғам мен мемлекет арасындағы өзара байланысты күшейтуге, сондай-ақ басқару жүйесіндегі ашықтық пен есептілікті арттыруға мүмкіндік беретінін атап өтті.

Оның пікірінше, реформалардың басты мақсаты – заманауи әрі тиімді мемлекеттік модель қалыптастыру. Бұл бағытта жаңа конституциялық институттарды енгізу, өкілді органдардың рөлін күшейту және қоғамдық диалогты дамыту мәселелеріне ерекше назар аударылып отыр.

Еске салайық, бұған дейін Парламент бірқатар конституциялық заң жобаларын, соның ішінде Халық кеңесі мен Құрылтай туралы заңдарды мақұлдаған болатын.