Ерлан Қошанов: Өңір халқының сұрақтарына Үкімет мардымды жауап бере алмады

Мәжілісте өткен жиында Мәжіліс Төрағасы Ерлан Қошановтың тарапынан Үкіметке қарата сын айтылды, – деп хабарлайды Aikyn.kz сайты.

Мәжіліс Төрағасы өңірлерден жиналған мәселелерге берілген жауаптардың мардымсыз екенін атап өтіп, алдағы кездесуде нақты нәтижелер күтілетінін жеткізді. Сонымен қатар, депутаттар тарапынан бақылау жалғасатынын ескертті.

Құрметті әріптестер!

Бүгін шынында көп сұрақ қойылды, көп ұсыныс айтылды. Егжей-тегжейлі талқыланды. Десе де Үкімет тарапынан берілген біраз жауап мардымсыз болғанын атап айту керек. Нақты сұрақтарға көбіне сырғытпа, жалпылама жауап берілді. Нақты істерді көрсете алмады. Ол туралы жаңа Фракция жетекшілері өз сөздерінде сынға алды.

Қанат Алдабергенұлы, бұл сұрақтың бәрін біз өңірлерге барып келгеннен кейін, күзде Премьер-министрдің атына жолдаған болатынбыз. Өңірлердегі тұрғындардың мыңдаған талап-тілегі мен сұрағына, өкінішке қарай мардымды жауап алған жоқпыз.

Бүгін осы мәселелердің орындалу барысын қарап жатырмыз. Келесі жылдың басында тағы да кездесу болады, ол кезде нақты нәтижелер күтеміз. Шынында өңірлерде мәселе көп. Оны күні кеше өткен Ауыл әкімдерінің диалог-платформасында көрдік. Оған өздеріңіз де қатыстыңыздар. Қаншама мәселе көтерілді. Түстен кейінгі 6 секцияның өзінде тағы да 100-ден астам мәселе ортаға салынды. Мемлекет басшысы сол жерде осы мәселелердің көбінің жүйелі шешімін ұсынды, нақты тапсырмалар берді. Олар қалай орындалады, қалай аяғына дейін жеткізіледі?

Бұл Мәжіліс депутаттарының тұрақты бақылауында болады. Көріп отырғанымыздай, әкімдер көтерген мәселелер мен өңірлерден жиналған талап-тілектер бір-бірімен байланысып жатыр. Олардың бәрін біз жақсы білеміз. Оны шешу бойынша күнделікті айналысуымыз керек. Келесі жылы осындай жиынымызда бұл мәселеге қайтып ораламыз. Сөзімнің соңында бәріңізге ортақ жұмысымыз үшін ризашылығымды білдіремін. Шақырылған азаматтарға рақмет. Сау болыңыздар!-деді Мәжіліс Төрағасы Ерлан Қошанов.