Ерлан Қошанов Халық кеңесінің төрағасы болып сайланды

Ерлан Қошанов Қазақстан Халық кеңесінің төрағасы болып сайланды, - деп хабарлайды Tengrinews.kz тілшісі.

Бұл шешімді жаңа конституциялық органның бірінші сессиясында Халық кеңесінің мүшелері жасырын дауыс беру нәтижесі бойынша қабылдады.

Бұған дейін Президент Қасым-Жомарт Тоқаев Халық кеңесінің төрағасы лауазымына Ерлан Қошановтың кандидатурасын ұсынған болатын.

Сурет: Ақорданың баспасөз қызметі

Конституциялық заңға сәйкес, төраға кеңес мүшелерінің жалпы санының көпшілік дауысымен жасырын дауыс беру арқылы сайланады. Оның өкілеттік мерзімі - төрт жыл. Бір адам бұл лауазымды қатарынан екі мерзімнен артық атқара алмайды.

Ерлан Қошанов 1962 жылы 14 тамызда Қарағанды облысының Ақсу-Аюлы ауылында дүниеге келген.

Қарағанды политехникалық институтын және Халық шаруашылығы академиясы жанындағы Жоғары коммерциялық мектепті бітірген. Мамандығы бойынша – инженер-механик және экономист.

Әр жылдары Үкімет аппаратында және Президент Әкімшілігінде жұмыс істеген, көлік және коммуникация вице-министрі болды, Азаматтық авиация комитетін басқарды.

2012 жылдан 2017 жылға дейін премьер-министр кеңсесін басқарды. 2017–2019 жылдары Қарағанды облысының әкімі лауазымын атқарды.

2019 жылдың қыркүйегінде Қошанов Президент Әкімшілігінің басшысы болып тағайындалды.

2022 жылдың ақпанынан бастап Парламент Мәжілісін басқарды. Сондай-ақ Amanat партиясының төрағасы лауазымын атқарды.

Төраға кеңес жұмысына жалпы басшылықты жүзеге асырады, оның сессияларын шақырады, күн тәртібін қалыптастырады, сессия мен төралқа отырыстарына төрағалық етеді, регламентті бекітеді және Халық кеңесінің атынан сөйлейді.

Сондай-ақ ол кеңес мүшелерінің арасынан өз орынбасарларын тағайындайды. Олар ротация принципі бойынша екі жыл қызмет етеді.

Тоқаев Қазақстан Халық кеңесі төрағасы лауазымына Қошановтың кандидатурасын ұсынды

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Бізді Google-дың негізгі дереккөздер тізіміне қосыңыз