Ермек Көшербаев аятолла Әли Хаменеймен қоштасу рәсіміне қатысты

Сапар аясында Ермек Көшербаевты Иран Ислам Республикасының Президенті Масуд Пезешкиан қабылдады. Сондай-ақ, ол Иранның Сыртқы істер министрі Аббас Аракчимен келіссөздер өткізді.

Мемлекет басшысы мен Қазақстан халқының атынан Ермек Көшербаев Иран халқына және басшылығына жуырдағы қайғылы оқиғаларға байланысты шынайы көңіл айтып, зардап шеккендердің тезірек сауығып кетуіне тілектестік білдірді.

Қазақстан мен Иран президенттері Бірлескен мәлімдеме қабылдады

Иран Президентімен өткен кездесуде тараптар Масуд Пезешкианның 2025 жылғы 10-11 желтоқсанда Қазақстанға жасаған ресми сапарының қорытындысы бойынша қол жеткізілген уағдаластықтарды іске асыру мәселелерін жан-жақты талқылады. Сонымен қатар өңірдегі қазіргі ахуал мен оның одан әрі даму перспективалары жөнінде пікір алмасты.

Аббас Аракчимен өткен келіссөздердің күн тәртібі екіжақты ынтымақтастықтың кең ауқымды мәселелерін, халықаралық және өңірлік ұйымдар шеңберіндегі өзара іс-қимылды, сондай-ақ Қазақстан - Иран қатынастарын одан әрі дамытуды қамтыды.

Қазақстан мен Иран көлік дәліздерін дамыту туралы келісімге келді

Ермек Көшербаев Қазақстанның Иранмен дәстүрлі достық, тату көршілік және өзара тиімді ынтымақтастық қатынастарын одан әрі нығайтуға берік бейілдігін растады. Сонымен қатар Иранның және өңір елдерінің тұрақтылық пен қауіпсіздікті қамтамасыз етудегі маңызды рөлі атап өтілді.

Қазақстан Сыртқы істер министрі Иран мен АҚШ арасында қол қойылған өзара түсіністік туралы меморандум аясында қол жеткізілген уағдаластықтардың маңыздылығын атап өтті.

Қазақстанның Иранға агроөнеркәсіп өнімдері экспорты 97%-ға артты

2026 жылғы 28 маусымда Бендер-Аббас қаласындағы Шахид Раджаи портынан қазақстандық көлік-логистикалық терминал салу үшін жер учаскесін беру туралы келісімге ерекше мән берілді. Бұл жобаның Мемлекет басшысының Қазақстанның көлік-транзиттік әлеуетін дамыту және экспорттық мүмкіндіктерін кеңейту жөніндегі тапсырмасына сәйкес жүзеге асырылып отырғаны атап өтілді.

Осыған байланысты терминал құрылысы Қазақстан мен Иран арасындағы өзара сауда көлемінің одан әрі артуына ықпал ететініне сенім білдірілді. 2025 жылдың қорытындысы бойынша екі ел арасындағы тауар айналымы 26,4%-ға өсіп, 430,2 млн АҚШ долларына жетті.

Иран Қазақстанға Ормұз бұғазындағы порттан жер телімін береді

Келіссөздер қорытындысында тараптар Қазақстан мен Иран арасындағы ынтымақтастықты одан әрі нығайтуға өзара мүдделілігін растады және екіжақты күн тәртібінің барлық бағыттары бойынша өзара іс-қимылды кеңейту жөніндегі бірлескен жұмысты жалғастыруға келісті.