Ертең LRT картасын рәсімдеу басталады

АСТАНА, 27 сәуір – Sputnik. Астанада 28 сәуірде LRT атаулы көлік картасын рәсімдеу басталады, деп хабарлады компанияның баспасөз қызметі.

Оқушылар мен жеңілдік санатына жататын азаматтар LRT атаулы көлік картасын рәсімдеуге онлайн өтінім бере алады.

"Картаны 7 жастан 18 жасқа дейінгі оқушылар, сондай-ақ қолданыстағы заңнамаға сәйкес жеңілдік санатына кіретін, Астана қаласында тіркелген және тұрақты тұратын азаматтар ала алады", - делінген хабарламада.

Карта дайын болған кезде пайдаланушының телефон нөміріне SMS-хабарлама жіберіледі. Картаны дайындау құны – 1200 теңге.

"Өтінім беру тек онлайн форматта ресми сайты арқылы беріледі. Рәсімдеу үшін қажетті мәліметтерді толтырып, құжаттарды цифрлық форматта жүктеу және картаны алу үшін өзіңізге ыңғайлы пунктті – жақын орналасқан аудандық әкімдікті таңдау қажет", - деп түсіндірді баспасөз қызметі.

Дайын карталар алты аудандық әкімдікте беріледі. Пайдаланушы картаны өтінім беру кезінде таңдаған әкімдіктен ала алады.

"LRT атаулы көлік картасы тек LRT желісінде жүруге арналған және қалалық автобус бағыттарында жарамсыз. Басқа жолаушыларға арналған көлік карталары мен бір реттік билеттер LRT іске қосылғаннан кейін стансаларда қолжетімді болады. Сондай-ақ турникеттерден кассаға жүгінбей өтуге мүмкіндік беретін баламалы төлем тәсілдері қарастырылған. Бұл туралы қосымша ақпарат кейінірек хабарланады", - деп толықтырды компания.