Есіктегі жіптер мен сызаттар: ІІМ ұрылардың белгілері туралы не дейді

Есіктегі жіп, құлыптағы қағаз немесе оғаш сызат: әлеуметтік желілерде пәтер ұрылары қалдырады-мыс делінетін күдікті белгілер туралы оқиғалар жиі пайда болады. Қаскөйлер тонауға пәтер таңдағанда расында осындай белгілерді қолдана ма? Егер есікте осындай бірдеңе байқасаңыз, алаңдауға негіз бар ма? Tengri Life бұл туралы ІІМ не дейтінін және пәтерді қорғауға қандай шаралар көмектесетінін білді.

Ұрылар есікке белгі салып кететіні рас па?

ІІМ пәтер ұрлығына дайындық кезінде қаскөйлер тұрғын үй мен ондағы жағдайды бақылаудың түрлі тәсілін қолдануы мүмкін екенін атап өтті. Мысалы, үй иелерінің жоқтығына назар аударып, пәтерге кіреберіс қаншалықты қорғалғанын тексереді.

Ведомство өкілдері есікте, пошта жәшігінде немесе кіреберіс қабырғада қандай да бір белгінің болуы өздігінен заңға қайшы ниет бар екенін білдірмейтінін атап өтті. Әлеуметтік желілерде тарап жүрген "ұрылар белгісі" деп аталатын кестені де сенімді ақпарат көзі деп санауға болмайды.

Сонымен қатар Қазақстандағы пәтер ұрылары қолданатын бірыңғай шартты белгілер жүйесі туралы ІІМ-де ешқандай мәлімет жоқ.

"Нақты белгілердің қылмысқа дайындықпен ықтимал байланысы әр жағдайда жеке анықталады", - деп түсіндірді ведомство өкілдері.

Фото:depositphotos.com

Қандай белгілерге назар аудару керек?

ІІМ жұмбақ символдарға емес, пәтер айналасындағы ерекше жағдайларға көбірек назар аударуға кеңес береді.

Мынадай белгілер байқалса, сақ болған жөн:

есіктер тұтқасын тексеріп немесе пәтер есіктерін мұқият қарап жүрген бейтаныс адамдар; құлыптағы, есіктегі немесе есік жақтауындағы зақымдану іздері; кіреберіс есік алдындағы белгісіз заттар; қайдан шыққаны түсініксіз күдікті белгі немесе сызат; бөтен адамдардың кіреберіске немесе пәтерге кіруге тырысуы.

Осындай әрбір жағдайды жеке қарастыру керек. Бірнеше күдікті белгінің болуы да қылмысқа дайындық жүріп жатқанын дәлелдемейді.

Егер есік алдынан белгісіз белгі немесе зат байқасаңыз, оны ұстауға немесе алып тастауға асықпаңыз. Табылған затты суретке түсіріп, жағдайды тіркеп, күдікті жайт туралы 102 нөмірі бойынша полицияға хабарлаған дұрыс.

Егер бейтаныс адамдар көрші пәтерлердің есігін тексеріп жатса немесе үйге кіруге әрекет жасаса, тез арада құқық қорғау органдарына хабарласу қажет. Бұл ретте күдікті тұлғаларды өз бетінше қуудың немесе ұстаудың қажеті жоқ.

Пәтерді ұрылардан қалай қорғауға болады?

ІІМ тұрғын үй қауіпсіздігін алдын ала қамтамасыз етуге кеңес береді.

Есік пен құлыпты тексеріңіз. Олар дұрыс жұмыс істеп тұруы және сенімді болуы тиіс. Қосалқы кілттерді пәтер маңындағы көзге көрінетін жерлерде қалдырмаған жөн. Қосымша қорғаныс орнатыңыз. Күзет дабылы, домофон және бейнебақылау пәтерге басып кіру қаупін азайтады. Терезе мен балконды ұмытпаңыз. Үйден шығарда терезе мен балкон есіктерінің жабық екенін тексеріңіз, әсіресе пәтер төменгі қабатта орналасқан болса. Кіреберіске назар аударыңыз. Дұрыс жұмыс істейтін домофон, жақсы жарықтандыру және ауладағы, сондай-ақ ортақ пайдаланылатын орындардағы бейнебақылау камералары қауіпсіздікті арттыруға көмектеседі. Көршілермен байланыста болыңыз. Тұрғындардың өзара қырағылығы бейтаныс адамдарды, күдікті немесе үйге кіру әрекеттерін уақытында байқауға септігін тигізеді. Ұзақ уақытқа кететініңізді айтпаңыз. Пәтерде ешкім болмайтын уақытты бөтен адамдарға айтудың немесе әлеуметтік желілерде алдағы сапар туралы ақпарат жариялаудың қажеті жоқ.

Егер ұзақ уақытқа кетіп бара жатсаңыз, ІІМ құлыпты тексеруді, терезе мен балкон есіктерін жабуды, мүмкіндігінше дабыл жүйесін қосуды және өзіңіз сенетін адамнан пәтерге көз қырын салып жүруді сұрауды ұсынады.

Фото: depositphotos.com

Пәтерді тонау әрекеті жасалса не істеу керек?

Егер үйге оралғанда құлыптың зақымданғанын, бұзып кіру іздерін немесе заттардың жоғалғанын байқасаңыз, мән-жайды өз бетіңізше анықтауға тырыспаңыз.

Бірінші кезекте 102 нөмірі бойынша полицияға қоңырау шалу керек. Қызметкерлер келгенге дейін күдікті заттарды ұстаудың, жағдайды өзгертудің немесе қылмыс іздерін өз бетінше іздеудің қажеті жоқ. Бұл оқиға орнын тексеруге кедергі келтіруі мүмкін.

Егер сіз күдікті адамдарды немесе ұрлыққа дайындықтың ықтимал белгілерін байқасаңыз, бұл туралы құқық қорғау органдарына хабарлаңыз. Нақты мекенжайды, уақытты көрсетіп, жағдайды егжей-тегжейлі сипаттау керек.

Сонымен, күдікті белгілер үшін дүрбелеңге түсудің қажеті жоқ, бірақ ұрлыққа дайындықтың ықтимал белгілерін де елеусіз қалдырмаған жөн. Пәтерді қауіпсіздендіру үшін құлыптың дұрыстығын қадағалап, кіреберістегі жағдайға назар аударып, қажет болған жағдайда күдікті жайттар туралы полицияға хабарлау қажет.

Бұған дейін Алматының криминалдық полиция қызметкерлері Алмалы ауданындағы әріптестерімен бірлесіп, бірнеше пәтер ұрлығына қатысы бар деген күдікпен бұрын сотталған ер адамды ұстады.

Бізді Google-дың негізгі дереккөздер тізіміне қосыңыз

Қосу