Еуропада Рождество жәрмеңкелеріне байланысты қауіпсіздік күшейтілді

Еуропа Рождество маусымын қарсы алуда.

Желтоқсан айы басталғалы қалаларда үш мыңнан астам мерекелік жәрмеңке ашылды. Миллиондаған адам ағылатын негізгі қысқы демалыс орындарында қауіпсіздік шаралары күшейтілді. Десе де туристердің қарасы қалың.

Желтоқсанда Еуропаның алаңдары нағыз рождестволық ауылдарға айналады. Ашық айдындар,  ағаштан жасалған жүздеген шағын үйлер, түрлі тағамның иісі. Жәрмеңкелер қысқы маусымда жергілікті тұрғындар мен туристер ағылатын басты орын. Әсіресе Страсбург, Мюнхен, Нюрнберг, Брюссель мен Будапешт сынды ең танымал жәрмеңкелерге жыл сайын 17 миллионнан астам адам келеді. Ал экономикалық әсері шамамен бір миллиард еуроға жуықтайды.

Франция, Париж

Париждегі ең ірі жәрмеңке дәстүрлі түрде Ла Дефанс ауданында орналасқан. 13 мың шаршы метр аумақта 300-ден астам шале келушілерге тағам, сусын, қолдан жасалған бұйымдар және түрлі сыйлықтар ұсынады. Францияда қарашаның соңынан бері Vigipirate жоспарының күшейтілген деңгейі енгізілген: патрульдер көбейтіліп, кіреберісте сөмкелерді тексеру күшейтілді, ал жәрмеңке маңайына көліктердің жақындауына шектеу қойылған.

Германияда да ел бойынша ортақ қауіпсіздік шаралары қабылданған. Бұған қоса,бірнеше ірі жәрмеңкенің ұйымдастырушылары қауіптің алдын алу мақсатында қорғаныс тосқауылдарын арттырып, тіпті жеке күзет қызметін жалдаған. Мұның бәрі Магдебург, Берлин және Страсбургте әр жылдары болған қайғылы оқиғалардан кейін қабылданған шұғыл шаралар.

Жасмин, АҚШ-тан келген турист:

- Мен Америкадан қонаққа келдім. Мұнда маған өте ұнады. Жәрмеңкеде адам Нью-Йоркпен салыстырғанда көп емес, кең әрі жайлы. Кіреберістегі тексерістерге байланысты кезектер бар, бірақ осының арқасында өзіңді қауіпсіз сезінесің.

Соланки, студент:

- Желтоқсанда  міндетті түрде жәрмеңкеге келемін. Әсіресе ыстық шоколад үшін. Сөмкелерді тексеру біз үшін қалыпты жағдай – көпшілік жиналатын кез келген жерде қауіпсіздік шаралары күшейтіледі. Айтпақшы, Қазақстанның табиғаты туралы әдемі видеолар көрдім, мүмкіндік болса сіздің елге барғым келеді. 

Ашық аспан астындағы мұз айдындары қарсыз Еуропа қалаларына ерекше қысқы атмосфера сыйлайды. Жәрмеңкелердің дені  қаңтардың алғашқы күндеріне дейін жалғасып, тұрғындар мен қонақтардың басты серуен орнына айналады. Ал сақтық шаралары мен қауіпсіздік қызметтерінің талаптарын орындау  мерекені оқыс жағдайсыз өткізуге сеп болады.

Айдана Айтбекқызы, Руслан Омиржан