Еуропадағы бірнеше ел Украинаға әскер жіберуге дайын НАТО Бас хатшысы

АСТАНА, 22 желтоқсан – Sputnik. НАТО-ның Бас хатшысы Марко Рютте Ресей "бейбітшілік шартын" бұзған жағдайда Еуропаның Украинаға әскер жіберуге дайын екенін мәлімдеді, деп хабарлады РИА Новости.

"Әрине, біз қазіргі уақытта мәліметтерді жария түрде талқылап жатқан жоқпыз. Бірақ мен бірнеше еуропалық ел қажет болған жағдайда әскер жіберуге дайын екенін білдірді деп айта аламын", - деді Рютте.

Рютте қазіргі уақытта "ниеттестер коалициясының" нақты құрылымын анықтау жұмыстары жүргізіліп жатқанын айтты.

Ресей Сыртқы істер министрлігі Украинаға НАТО әскерлерін орналастыруға қатысты кез келген сценарий Мәскеу үшін қолайсыз және қақтығыстың ушығып кету қаупі бар екенін бірнеше рет мәлімдеді.

Ресей Украина Қарулы күштері өз позицияларын нығайту үшін атысты тоқтатуды пайдалана алатынын бірнеше рет хабарлаған.