Еуропалық комиссия Украинаға тағы 1 миллиард еуро аударды

АСТАНА, 15 шілде – Sputnik. Еуропалық комиссия екі жылға арналған 90 млрд еуролық несие пакеті аясында, бұрын уәде етілген алты миллиард еуроның ішінен тағы бір миллиард еуроны Украинаға ұшқышсыз ұшу аппараттарын сатып алу үшін аударғанын хабарлады.

Бұл туралы РИА новости жазды.

"Бүгін Еуропалық комиссия Украинаға ұшқышсыз ұшу аппараттарын сатып алу үшін тағы бір миллиард еуро аударды. Бұл – осы мақсатқа бөлінген алғашқы алты миллиард еуролық транш аясындағы екінші төлем", – делінген хабарламада.

Еуропалық комиссия бұл қаражаттың Украинаның дрондар сатып алу әлеуетін дамытуға арналғанын атап өтті.

Бұл жаңа қаржылық көмек пакеті емес. Қаражат Еуропалық Одақ 2026 жылдың басында қабылдаған жалпы көлемі 90 миллиард еуроға дейінгі несие бағдарламасы бойынша бөлініп жатыр. Бұл сомадан 2026 жылы Украинаның мемлекеттік бюджетін қолдау және қорғаныс өнеркәсібін дамытуды қоса алғанда, 45 миллиард еуроға дейінгі қаражат бөлу көзделген.

Еуропалық комиссия 30 маусымда Украинаға дрондар сатып алу үшін 3,9 миллиард еуро көлеміндегі алғашқы траншты аударды. Бірнеше күн бұрын, 25 маусымда Киев осы бағдарлама бойынша бастапқы 3,2 миллиард еуро көлеміндегі макроқаржылық көмек алған болатын.