FlyArystan қызметкерлеріне аса ірі көлемде жымқыру дерегі бойынша үкім шықты

Алматы қаласының Алмалы аудандық соты FlyArystan-ның үш қызметкеріне қаржылық заңсыздықтар мен аса ірі көлемдегі жымқыру әрекеттері үшін үкім шығарды, деп хабарлайды Arasha.kz сайты Air Astana-ға сілтеме жасап.

Air Astana әуе компаниясы FlyArystan қызметкерлері — Дәуір Еркенұлы, Еркін Исанов және Ренат Әбілхановқа қатысты қаржылық заңсыздықтар туралы іс бойынша сот талқылауының аяқталғанын хабарлады.

Алматы қаласының Алмалы аудандық соты аталған тұлғаларды аса ірі көлемде жымқыру және ұрланған ақшалай қаражатты заңдастыру (жылыстату) бойынша кінәлі деп таныды. Сот оларға 8,5 жылдан 9 жылға дейінгі мерзімге бас бостандығынан айыру жазасын тағайындады.

Air Astana өкілдері мәлімдегендей, бұл үкім компания бастамасымен жүргізілген ішкі тексеріс қорытындыларын растап отыр. Тексеріс барысында анықталған заң бұзушылықтар құқық қорғау органдарына жүгінуге негіз болған.

Сот талқылауы барысында істің барлық мән-жайы қаралып, сот айыпталушылардың іс-әрекеттерінің құқыққа қайшы сипаты туралы қорытындыға келді. Сондай-ақ компания Ренат Әбілхановтың бұған дейін қоғамдық кеңістікте таралған және істің нақты жағдайларына сәйкес келмейтін түсіндірмелері өз растауын таппағанын атап өтті.

Сот үкімі заңды күшіне енген жоқ.