Freedom Finance ҚазТАГ пен дауды медиация арқылы реттеуге дайын

Freedom Finance Kazakhstan «ҚазТАГ» ақпарат агенттігімен арадағы сот дауын медиациялық келісім арқылы шешуге дайын екенін мәлімдеді.

Компанияның хабарлауынша, негізгі мақсат материалдық өтемақы өндіру немесе журналистерден жария түрде кешірім сұрату емес, іскерлік беделін қорғау және шындыққа сәйкес келмейтін ақпараттың таралуына жол бермеу.
Freedom Finance өкілдерінің айтуынша, бұған дейін агенттікке жолданған сотқа дейінгі талапта даулы жарияланымдарды алып тастау, оларды жоққа шығару және жалған ақпараттың таралуын тоқтату ұсынылған. Алайда редакция бұл талаптармен келіспегеннен кейін компания сотқа жүгінген.

Компания медиациялық келісім жасау үшін үш негізгі шарт ұсынып отыр. Біріншісі – «ҚазТАГ» жариялаған материалдардың шындыққа сәйкес келмейтінін және компанияның іскерлік беделіне нұқсан келтіргенін мойындау. Екіншісі – Қазақстанның «Масс-медиа туралы» заңының талаптарына сәйкес ресми жоққа шығару жариялап, даулы материалдарды барлық платформалардан алып тастау. Үшінші шарт бойынша жалған ақпарат таратқаны және медиа заңнамасын бұзғаны үшін жауапкершілікті мойындау келісімде көрсетілуі тиіс.

Компания өз мәлімдемесінде дауды бейбіт жолмен шешуге мүдделі екенін атап өтіп, бұқаралық ақпарат құралдарын ақпараттың нақтылығы мен объективтілігі қағидаттарын сақтауға шақырды.

Еске салайық, бұған дейін Freedom Finance пен «ҚазТАГ» арасында жарияланған материалдарға байланысты сот дауы туындаған болатын. Компания агенттіктің бірқатар материалдарын жалған әрі өзінің іскерлік беделіне нұқсан келтіретін ақпарат ретінде бағалаған.