Ғарыштан түсірілген: Ресейлік ғарышкер Алакөлдің таңғажайып суретін жариялады

Фото: instagram.com/anton_astrey

«Жер планетасының үстінен әр өткен сайын оның қаншалықты ғажайып екенін тағы бір мәрте сезінесің. Бұл суретте – Қазақстандағы Алакөл. Ғарыштан қарағанда ол қарлы тау жоталарымен қоршалған алып көгілдір жауһарға ұқсайды», деп жазды ғарышкер.

Сондай-ақ ол Алакөлдің мөлдір суымен, бай жануарлар дүниесімен танымал екенін және реликті шағаланы қоса алғанда, қоныс аударатын құстар үшін маңызды аялдау орны саналатынын атап өтті.

«Орбитадан қарағанда, Жердегі су, таулар мен ұлан-ғайыр даланың өзара үйлесімі ерекше анық көрінеді. Осындай көріністер біздің Жердің шын мәнінде бірегей әрі ғажайып ғарыштағы ортақ үйіміз екенін тағы да еске салады. Сондықтан оны қорғау – бәріміздің міндетіміз», деді ол.

Алакөл – Қазақстандағы ең ірі көлдердің бірі. Ол елдің шығысында, Абай және Жетісу облыстарының шекарасында, Қытаймен шекараға жақын орналасқан.

Көл Жоңғар Алатауы мен Тарбағатай жоталарының аралығында жатыр. Алматыдан шамамен 600 шақырым қашықтықта орналасқан. Мұнда пойызбен, автокөлікпен немесе Үржарға дейінгі ішкі әуе рейстері арқылы жетуге болады.

Жазғы демалысқа жеңілдікпен: Алакөл бағытына билет бағасы 20%-ға арзандады

Алакөлдің басты ерекшелігі – суының ерекше құрамы. Су аздап тұзды, минералдарға бай және тері, буын мен тыныс алу жүйесі ауруларына шалдыққан адамдар үшін пайдалы деп есептеледі. Осыған байланысты көл көп жылдан бері Қазақстандағы ең танымал шипажайлардың бірі саналады.

Жаз мезгілінде көл суы жақсы жылынады, ал шомылу маусымы әдетте маусымнан қыркүйекке дейін жалғасады.

Шомылу маусымына дайын: Алакөл жағалауында инфрақұрылым жұмыстары толық аяқталды

Алакөлге ерекше танымалдық әкелген – реликті шағала. Бұл – дүниежүзінің санаулы ғана жерінде ұялайтын өте сирек құс. Маусымдық қоныс аудару кезінде мұнда ондаған мың құс аялдайды. Сондықтан Алакөл Орталық Азиядағы ең маңызды орнитологиялық аймақтардың бірі болып есептеледі.

Алакөлдің ауданы 2,6 мың шаршы шақырымнан асады. Бұл оны Қазақстандағы ең ірі ішкі су айдындарының біріне айналдырады.

Емдік су және бірегей табиғат: Алакөлге барудың бес себебі

Көлдің ең терең жері шамамен 54 метрге жетеді. Суының түсі де ерекше: ауа райы мен жарыққа байланысты қою көктен ашық көгілдір түске дейін құбылып тұрады.

Мөлдір суы, асқақ таулары мен ұлан-ғайыр даласы үйлесім тапқан Алакөл Қазақстандағы ең көркем жерлердің бірі саналады.