Ғибратты ғұмыры ұрпаққа үлгі

Белгілі мемлекет және қо­ғам қайраткері, ғалым, философия ғылымдарының докторы, профессор, Қазақстан Республикасы Ұлттық ғылым академиясының акаде­мигі, Қазақстанның еңбек сіңір­ген ғылым қайраткері, Л.Н.Гумилев атындағы Еуразия ұлт­тық университетінің профессоры Жабайхан Мүбәрәкұлы Әбділдин өмірден өтті деген суық хабар көңілімізді құлазытып кетті. Ол заманымыздың заңғар тұлғасы еді.

Ж.Әбділдиннің басшылы­ғымен бұрынғы Кеңес одағына және шетелдерге кеңінен танымал философиялық мектеп қалыптасты. Туған еліне азамат­тық берік ұстанымымен де, ғылым жолындағы қабілет-қарымымен де аянбай қызмет етті. Соңында өшпейтін өнегелі, айшықты ізі қалды.

Ж.Әбділдиннің ғылыми ең­бек­тері, негізінен, диалек­тика­лық логиканың өзекті мәсе­лелерін зерттеуге арналды. Оның басқаруымен осы бағытта ұжымдық моногра­фиялар жарық көрді. Диалек­тиканың ғылыми жүйе­сі жасалды. Ол қазіргі жараты­лыстану ғылымдарының методо­логия­лық мәселелерімен ұштасты­рылды.

Университетіміздің профессоры Жабайхан Мүбәрәк-ұлының философияның іргелі мәселе­лері – таным теория­сын, диалек­тиканың әм­бе­бап заңдылықтары мен ка­те­­горияларын, оның ішкі ло­гикалық байланыстары мен әдіс­темесін, әлемдік философия тарихын, оның басты өкілдерінің көзқарастарын студент-жастар қауымы ыждағатпен оқып-үйренді.

Қайраткер Ж.Әбділдин аза­мат ретінде жазықсыз құр­бан болған Алаш арыстарын ақтау жөніндегі комиссия­ны басқарып, олардың ақ­талып, еңбектерінің жарық кө­руіне айрықша атсалысты. Шәкәрім, Мағжан, Жүсіпбек, Ахмет пен Міржақыпты туған халқымен қайта қауыштырып, шығармашылық мұраларының ел игілігіне айналуына себепкер болды. Елі, жері, тіпті күллі адамзат үшін де тындырған ісі зор десек, артық айтпаймыз. Бірегей жаратылған, даңғаза мен дақпыртқа, дандайсуға жаны қас азамат еді. Қай істе де ар мен адалдықты, сабыр мен салмақтылықты биік қоятын.

Жабайхан Әбділдин – адамзат пен ғаламзаттың дара құбылысы. Отандық философия ғылымының дамуына, тәуелсіз еліміздің өркендеуіне өлшеусіз үлес қосқан зиялы тұлға еді. Ол шын мәнінде кісілік пен даналықтың үл­гісіндей, әділдіктің таразысындай абыз ақсақалымыз болатын.

Адамгершілік қасиеті мол, жаны жайсаң, жүрегі кіршіксіз абзал азаматтың елге сіңірген еңбегі мен жарқын дидарын халқымыз әрдайым жадында сақтайды деп сенеміз. Оның ғылымдағы мол мұрасы мен ғибратты ғұмыры кейінгі ұр­паққа үлгі болып қала бермек.

Л.Н.Гумилев атындағы ЕҰУ ұжымы