Халықаралық білім білікті кадр кепілі

Мұндай жобалар білім беру сапасын арттырып қана қоймай, халықаралық тәжірибені енгізуге, академиялық ортаны дамытуға және ел экономикасының түрлі саласына қажетті жоғары білікті, бәсекеге қабілетті мамандарды даярлауға берік негіз қалайды.

Осынау жүйелі жұмыстың бірі Шымкент қаласында жүзеге асып келеді.

Мемлекет басшысы Қасым-Жомарт Тоқаевтың елімізде әлемнің же­текші жоғары оқу орындарының филиалдарын ашу жөніндегі тап­сырмасы аясында жүзеге асырылып жатқан бастамалар отандық жоғары білім беру жүйесін жаңа сапалық деңгейге көтеруге жол ашып отыр. Соның жарқын көрінісінің бірі – Шымкент қаласындағы Өзбекәлі Жәнібеков атындағы Оңтүстік Қа­зақ­стан педагогикалық универ­си­теті жанынан Түркияның беделді Гази университетінің филиалының ашылуы.

Биыл филиал 2026-2027 оқу жы­лына талапкерлерді қабылдау нау­қанын бастап, білімге ұмтылған жас­тардың зор қызығушылығына ие болды. Биылғы оқу жылына 100 мемлекеттік білім гранты бөлінсе, конкурсқа қатысуға 150-ге жуық та­лапкер ниет білдірген. Бұл көр­сет­кіш жастардың халықаралық стандарттарға сай білім алуға және шетелдік жоғары оқу орнының бағ­дарламасы бойынша оқуға де­ген сұранысының жоғары екенін аңғартады. Қабылдау емтихандары халықаралық талаптарға сәйкес екі кезең бойынша ұйымдас­ты­рыл­ды. Алғашқы кезеңде талап­кер­лер жазбаша емтихан тапсы­рып, өздерінің теориялық дайын­ды­ғы мен академиялық білім дең­гейін көрсетті. Жоғары нәтиже көр­сеткен талапкерлер ғана екін­ші кезең әңгімелесуге жолдама ал­ды. Әңгімелесу барысында үміт­керлердің кәсіби мотивациясы, пе­дагогикалық ойлау қабілеті, сы­ни және аналитикалық ойлауы, көш­басшылық қасиеттері, ком­му­никациялық дағдылары және бо­ла­шақ мамандыққа деген көз­қа­расы жан-жақты бағаланады.

Қабылдау емтихандарының әділ әрі ашық өтуін қамтамасыз ету мақсатында іріктеу жұмыс­та­рын Түркияның Гази универси­те­тінен арнайы келген профессорлар жүргізуде. Бұл талапкерлердің бі­лімін халықаралық академиялық та­лаптар негізінде бағалауға мүм­кін­дік беріп қана қоймай, қа­был­дау үдерісінің ашықтығы мен объек­тивтілігін қамтамасыз етеді. Алғашқы емтиханның басталуына Өзбекәлі Жәнібеков атындағы ОҚПУ Басқарма төрағасы – Рек­тор Қайрат Балабиев қатысып, та­лапкерлерге сәттілік тіледі.

– Мемлекет басшысы Қасым-Жомарт Тоқаевтың елімізде әлем­нің жетекші жоғары оқу орын­да­ры­ның филиалдарын ашу жөнін­дегі тапсырмасы аясында, Ғылым жә­­не жоғары білім министрлігінің қол­­дауымен жүзеге асқан бұл жо-ба – Қазақстанның жоғары білім бе­ру жүйесін халықаралық деңгей­ге көтеруге бағытталған маңызды бас­тама. Бұл бастама Қазақстан мен Түркия арасындағы академия­лық ынтымақтастықты жаңа дең­гейге шығарып қана қоймай, пе­да­гогикалық білімнің сапасын арт­­тыруға, әлемдік озық тәжіри­бені енгізуге және еңбек нарығына сұранысқа ие білікті мамандар даярлауға ықпал етеді. Біздің мақ­сатымыз – қабылдау емти­хан­да­ры­ның жоғары деңгейде, әділ әрі ашық өтуін қамтамасыз етіп, та­лап­керлерге барлық қажетті жағ­дай жасау, – деді Қайрат Рахымұлы.

Бүгінде еңбек нарығында тек теориялық біліммен шектел­мей­тін, бірнеше тілді меңгерген, ха­лық­аралық тәжірибеге бейімдел­ген, заманауи технологияларды еркін қолданатын мамандарға сұ­раныс артып келеді. Осы тұр­ғы­дан алғанда Гази университеті фи­лиалы кадрларды даярлаудың жаңа моделін қалыптастыруға бағытталған маңызды білім беру алаңына айналуда. Мұнда білім беру бағдарламалары халықаралық стандарттарға негізделіп, оқу үде­рі­сіне шетелдік профессорлар тар­тылып, академиялық ұтқырлық мүм­кіндіктері қарастырылған. Фи­лиалда білім алатын студенттер Қа­зақстан және Түркия жоғары оқу орындарының талаптарына сәй­кес әзірленген бағдарламалар бойынша оқып, халықаралық дең­гейде мойындалатын екі диплом алу мүмкіндігіне ие болады. Бұл тү­лек­тердің елімізде ғана емес, шет­елде де кәсіби мансап құруына жол ашады.

ҰБТ-дан 111 балл жинаған Шым­­­­кент қаласының түлегі Жұ­мабек Гүлсезім де таңдауының дәл осы оқу орнына түсу себебін ерек­ше атап өтті.

– Маған ең алдымен осы уни­вер­ситеттің екі дипломдық білім беру жүйесі ұнады. Сонымен қатар ше­телдік профессорлардан дәріс алып, халықаралық деңгейдегі білі­м алу мүмкіндігі қызықтырды. Жазбаша емтиханда оқылым және тың­далым бағыттары бойынша түр­лі тапсырма орындадық. Емти­хан жоғары деңгейде ұйымдас­ты­рыл­ды, – дейді талапкер.

Бүгінгі талапкер ертеңгі ел да­муына үлес қосатын маман. Сон­дық­­тан халықаралық білім беру тә­­жірибесін елімізге енгізу, үздік уни­верситеттердің мүмкіндігін қа­зақстандық жастарға ұсыну – бо­ла­шаққа салынған инвестиция. Га­зи университеті филиалының жұ­мысы да осы мақсатқа қызмет етіп, жаңа буын кәсіби маманда­рын даярлауға берік негіз қа­лайды.

Назгүл НАЗАРБЕК, Шымкент қаласы